عظمیٰ نیوز سروس
سرینگر// وزیر اعلیٰ عمر عبداللہ نے پیر کے روز اس بات کی تصدیق کی کہ ان کی حکومت پارلیمنٹ کے مانسون اجلاس کے پہلے دن قومی دارالحکومت میں احتجاج کے ساتھ ریاست کی بحالی کے لئے دبائو ڈالے گی۔ انہوں نے انکشاف کیا کہ انہوں نے وزیر اعظم نریندر مودی کے ساتھ حالیہ بات چیت کے دوران خطے کی مالی حالت سمیت کئی مسائل کو اٹھایا ہے۔انہوں نے کہا”اس منصوبے میں کوئی تبدیلی نہیں ہوئی ہے،ہمارا پورا ارادہ ہے کہ دہلی جا کر اپنا پیغام جنتر منتر پر رکھیں تاکہ جموں و کشمیر کے لوگوں کو سپریم کورٹ، پارلیمنٹ اور مختلف عوامی تقاریب میں کیے گئے ریاست کے وعدے کے بارے میں یاد دلایا جا سکے،” ۔وزیر اعظم کے ساتھ حالیہ ملاقات کے بارے میں عمر عبداللہ نے کہا کہ میں نے مختلف امور پر وزیر اعظم سے بات کی۔
میں نے ریاست کی حیثیت، جموں و کشمیر کی مالی حالت اور ترقی کو کس طرح تیز کیا جا سکتا ہے کے بارے میں بات کی۔ انہوں نے کہا کہ مجھے امید ہے کہ لوگ اس گفتگو سے مستفید ہوں گے۔ریزرویشن کے دیرینہ مطالبہ کے بارے میں پوچھے جانے پر، سی ایم نے کہا کہ کابینہ کی ذیلی کمیٹی کی رپورٹ کو ریاستی کابینہ نے منظور کیا اور لیفٹیننٹ گورنر کو بھیجا، جس نے اسے باضابطہ طور پر مرکز کو بھیج دیا ہے۔ انہوں نے کہا”مرکزی حکومت نے کچھ وضاحتیں طلب کیں، فائل ہمیں واپس بھیج دی گئی، محکمے نے جوابات تیار کر لیے ہیں، جواب کو منظور کرنے کے لیے کابینہ چند دنوں میں میٹنگ کرے گی، جس کے بعد اسے مرکز کو واپس بھیج دیا جائے گا،” ۔سالانہ یاترا کے حوالے سے عمر نے یاتریوں کے لیے نیک خواہشات کا اظہار کیا۔ انہوں نے کہا، ہمیں امید ہے کہ ان کا سفر اچھا رہے گا، اور جب وہ وہاں جائیں گے اور دعا کریں گے تو یہ اچھا ہو گا کہ وہ جموں و کشمیر کے لوگوں کی بہتری کے لیے کچھ الفاظ کہیں۔
