یواین آئی
نئی دہلی//حج 2025کے خواہشمند عازمین کا انتخاب 7اکتوبر یعنی آج وزراتِ اقلیتی امور کے ڈائریکٹر اور حج کمیٹی آف انڈیا کے سی ای او ڈاکٹر لیاقت علی آفاقی کی قیادت میں آر کے پورم میں واقع کمیٹی کے برانچ آفس میں کمپوٹرائز قرعہ اندازی (ڈی آر ایس)کے ذریعہ کرایا جائے گا۔ یہ اطلاع حج کمیٹی آف انڈیا نے پریس کے لیے جاری ایک بیان میں دی۔عازمین حج مرکزی و ریاستی حج کمیٹیوں کے ذمہ داران اور حج سے وابستہ سرکاری و غیر سرکاری تنظیمیں اس لنک پر https://hajcommittee.gov.in قرعہ اندازی کو براہ راست دیکھ سکتے ہیں۔ منتخب شدہ عازمین کو ایس ایم ایس کے ذریعے بھی انتخابات کی اطلاع دی جائے گی۔ منتخب عازمین کی فہرست حج کمیٹی آف انڈیا کی ویب سائڈ اور حج سیودھا ایپ پر بھی دیکھی جا سکتی ہے۔ قرعہ اندازی کے موقع پر وزارتِ اقلیتی امور کے ڈپٹی سیکرٹری اور حج کمیٹی آف انڈیا کے ڈپٹی سی، ای، او نظیم احمد، آئی،او،ایف،ایس کے ساتھ وزارتِ اقلیتی امور، حج کمیٹی آف انڈیا، این، آئی، سی کے اعلی افسران و ذمہ داران بھی موجود رہیں گے۔
