یو این آئی
نئی دہلی//وزیر اعظم نریندر مودی نے اتوار کو یقین ظاہر کیا کہ گڈس اینڈ سروس ٹیکس(جی ایس ٹی)میں اصلاحات کے اگلے مرحلے کے لیے مرکز کی طرف سے بھیجے گئے مسودے کو جلد ہی ریاستوں کی حمایت حاصل ہو جائے گی اور ملک کو جی ایس ٹی اصلاحات کا ڈبل بونس ملے گا ملک میں اصلاحات کو آگے لے جانے کے عزم کو دہراتے ہوئے مودی نے کہا’’ہمارے لیے اصلاحات کا مطلب اچھی حکمرانی اور سہولت ہے‘‘۔وزیر اعظم دارالحکومت میں ریموٹ کنٹرول کے ذریعے 11000 کروڑ روپے کے قومی اہمیت کے مختلف ہائی وے پروجیکٹوں کا افتتاح کرنے کے بعد ایک اجتماع سے خطاب کر رہے تھے۔ انہوں نے کہا’’اس دیوالی سے جی ایس ٹی اصلاحات کے تحت ڈبل بونس ملنے والا ہے۔ اس کا مسودہ تمام ریاستوں کو بھیج دیا گیا ہے۔ ہمیں امید ہے کہ ریاستی حکومتیں اس میں تعاون کریں گی اور اسے قبول کریں گی۔ اس سے عوام اور کاروبار کو فائدہ ہوگا‘‘۔اس موقع پر مودی نے اپوزیشن لیڈر راہل گاندھی کا نام لیے بغیر آئین کی کتاب دکھانے پر تنقید کی۔ انہوں نے کہا کہ جو لوگ آج آئین کی کتاب سروں پر رکھ کر ناچ رہے ہیں وہ بابا صاحب کے آئین کو دغا دے رہے تھے اس کی مثال دہلی کے میونسپل قانون میں یہ شق تھی جس میں یہ التزام تھا کہ اگر کوئی صفائی کارکن بغیر بتائے کام پر نہیں آیا تو اسے ایک ماہ کے لیے جیل میں ڈال دیا گیاجاتا تھا۔وزیر اعظم نے کہا، “یہ مودی حکومت ہے جو ایسے قوانین کو تلاش کر رہی ہے اور انہیں ختم کر رہی ہے۔” انہوں نے کہا کہ آج دہلی اور آس پاس کی ریاستوں میں بی جے پی کی حکومتیں ہیں، لیکن کچھ لوگ بی جے پی کے لیے عوام کے آشیرواد کو ہضم نہیں کر پا رہے ہیں۔ مودی نے کہا، “عوام کے آشیرواد کے بعد، یہ ہماری ذمہ داری ہے کہ ہم دہلی اور این سی آر کی ترقی کریں، یہاں کے لوگوں کے لیے سہولیات کو ترقی دیں۔”انہوں نے ایک بار پھر لوگوں سے سودیشی کو اپنانے اور ملک کو مضبوط بنانے میں اپنا حصہ ڈالنے کی اپیل کی۔
