جموں و کشمیرکیلئے شہری مشاورت کا پلیٹ فارم’ مائی گورنمنٹ‘ کا آغاز

جموں// لیفٹیننٹ گورنر منوج سنہا نے بدھ کو جموں و کشمیر کے لیے ایک مضبوط شہری مشاورت کا پلیٹ فارم ’ مائی گورنمنٹ ‘کا آغاز کیا۔اس موقع پر خطاب کرتے ہوئے، لیفٹیننٹ گورنر نے کہا کہ شہریوں اور حکومت کے درمیان شراکت داری قائم کرنے کے لیے اختراعی پلیٹ فارم ،شراکتی طرز حکمرانی اور پالیسی سازی کو فروغ دے گا۔لیفٹیننٹ گورنر نے مزید کہا کہ’ مائی گورنمنٹ‘ جموں و کشمیر انتظامیہ کو عام آدمی کے قریب لائے گی اور انہیں یہاں کی سماجی و اقتصادی تبدیلی کے سلسلے میں مختلف مسائل پر رائے، خیالات اور تجاویز کا اشتراک کرنے کا موقع فراہم کرے گی۔ لیفٹیننٹ گورنر نے کہا کہ عوام پر مبنی پالیسی سازی کے لیے شہریوں کی تجاویز ضروری ہیں اور یہ پلیٹ فارم اس بات کو یقینی بنائے گا کہ منصوبہ بندی اور فیصلہ سازی میں تمام اسٹیک ہولڈرز کے خیالات کو شامل کیا جائے۔نئی پہل کو جموں و کشمیر کے شہریوں کے نام وقف کرتے ہوئے، لیفٹیننٹ گورنر نے لوگوں کی امنگوں کو پورا کرنے کے لیے حکومت کے عزم کا اعادہ کیا۔لیفٹیننٹ گورنر نے مزید کہا کہ ہم شراکتی حکمرانی کے نئے معیارات مرتب کر رہے ہیں، ٹیکنالوجی پر مبنی حل فراہم کر رہے ہیں، سرکاری سکیموں اور پروگراموں کی حقیقی وقت میں نگرانی کر رہے ہیں، اور عوامی خدمات کو جموں و کشمیر کے لوگوں کے لیے آسانی سے قابل رسائی بنا رہے ہیں۔اس موقع پر بات کرتے ہوئے چیف سکریٹری ڈاکٹر ارون کمار مہتا نے عہدیداروں سے کہا کہ وہ زیادہ موثر انداز میں شہریوں تک پہنچیں اور اس بات کو یقینی بنانے پر پوری توجہ مرکوز کریں کہ لوگوں کے لیے جو سہولیات اور خدمات فراہم کی گئی ہیں ان کا ان کے ذریعہ بھرپور استعمال کیا جائے۔ جموں کشمیرمائی گورنمنٹ پلیٹ فارم لانچ کرنے والا پہلا مرکز کے زیر انتظام علاقہ  بن گیا ہے۔بعد میں، لیفٹیننٹ گورنر نے یو ٹی ڈیش بورڈ کا بھی آغاز کیا۔ ڈیش بورڈ فیصلہ سازی میں آسانی کے لیے مختلف سرکاری محکموں کے ترقیاتی کاموں اور فلیگ شپ اسکیموں کی نگرانی کرے گا۔ UT ڈیش بورڈ کلیدی پرفارمنس انڈیکیٹرز (KPIs) کی بنیاد پر مختلف محکموں سے متعلق مختلف اسکیموں کی کارکردگی کے گرافیکل جائزہ کی سہولت فراہم کرتا ہے۔