عظمیٰ نیوز سروس
جموں//چیف جسٹس جموں و کشمیر اور لداخ ہائی کورٹ جسٹس این کوٹیشور سنگھ نے جموں میں چیف جسٹس کورٹ روم میں جسٹس راجیش سیکھری کو جموں و کشمیر اور لداخ ہائی کورٹ کے ایڈیشنل جج کے عہدے کا حلف دِلایا۔حلف برداری کی تقریب میں جسٹس تاشی ربستن، جسٹس اَتل شری دھرن، جسٹس سندھو شرما، جسٹس پونیت گپتا، جسٹس راہل بھارتی اور جسٹس محمد یوسف وانی نے شرکت کی جبکہ جسٹس سنجیو کمار، جسٹس رجنیش اوسوال، جسٹس وِنود چٹرجی کول، جسٹس سنجے دھر، جسٹس جاوید اِقبال وانی، جسٹس محمد اَکرم چودھری، جسٹس موکشا کھجوریہ کاظمی اور جسٹس وسیم صادق نرگل نے سری نگر سے بذریعہ ورچیول موڈ تقریب میں حصہ لیا۔حلف برداری کی تقریب کی نظامت کے فرائض رجسٹرار جنرل شہزاد عظیم نے انجام دی جنہوں نے مرکزی حکومت وزارت قانون و اِنصاف، محکمہ انصاف (تقرری ڈویژن) سے موصول ہونے والے نوٹیفکیشن، صدر جمہوریہ ہند کی طرف سے جاری کردہ وارنٹ آف اپوائنٹمنٹ اور لیفٹیننٹ گورنر یونین ٹیریٹری جموںوکشمیر کی طرف سے جاری کردہ اِختیار نامے کے اِقتباسات کو پڑھا جس میں چیف جسٹس جموں و کشمیر اور لداخ ہائی کورٹ کو جسٹس راجیش سیکھری کو عہدے کا حلف دِلانے کا اِختیار دیاگیا۔تقریب میں ہائی کورٹ کے سابق ججوں، ایڈوکیٹ جنرل، ڈپٹی سالیسٹر جنرل آف اِنڈیا جموں، ایڈیشنل چیف سیکرٹری جل شکتی، اے ڈی جی پی جموں، پرنسپل ڈسٹرکٹ جج جموں، بار ممبران، سول اور پولیس اِنتظامیہ کے دیگر افسران اور رجسٹری کے افسران اور عملہ نے بھی شرکت کی۔
