عظمیٰ نیوز ڈیسک
چنئی// تمل ناڈو میں کچھ اسکولوں و کالجوں میں بم دھماکہ کی دھمکی دی گئی ہے جہاں تیروچیراپلی ضلع کے 2نجی خود مختار کالجوں کے علاوہ 7 اسکولوں کو بروز جمعرات ای میل کے ذریعے بم کی دھمکیاں موصول ہوئیں۔ پولیس کے ذریعہ دی گئی جانکاری کے مطابق سینٹ جوزف کالج اور ہولی کراس کالج کے علاوہ کیمپین اینگلو انڈین ہائیر سیکنڈری اسکول، سمدھا ہائیر سیکنڈری اسکول، مونٹفورٹ اسکول، آچاریہ شکشا مندر اسکول، راجم کرشنامورتی پبلک اسکول اور امرتا ودیالیم سکول کو صبح ایک ای میل موصول ہوئی جس میں دھمکی دی گئی کہ وہاں کسی بھی وقت بم دھماکہ ہو سکتا ہے۔مذکورہ تعلیمی اداروں میں بم دھماکہ کی دھمکی کی خبر ملتے ہی سینئر پولیس افسران نے تمل ناڈو بم ڈٹیکشن اینڈ ڈسپوزل اسکواڈ (بی ڈی ڈی ایس)اور تمل ناڈو فائر اینڈ ریسکیو سروسز ڈپارٹمنٹ کے اہلکاروں کے ساتھ الگ الگ ٹیمیں تشکیل دیں۔ پھر ان ٹیموں نے متعلقہ تعلیمی اداروں کے احاطے کی مکمل تلاشی لی۔ اس تلاشی مہم میں کتوں کی بھی خدمات حاصل کی گئیں۔ فی الحال کوئی دھماکہ خیز مواد نہیں ملا ہے، تاہم تلاش جاری ہے۔ ابتدائی تفتیش کے بعد پولیس کو شبہ ہے کہ بم کی دھمکی محض افواہ ہے۔بتایا جا رہا ہے کہ ای میل بھیجنے والے کا نام سویتا بالاکرشنن ظاہر کیا گیا ہے۔ سائبر کرائم ونگ پولیس کی جانب سے تفصیلی تفتیش کی جا رہی ہے تاکہ یہ معلوم کیا جا سکے کہ اصل بھیجنے والا کون ہے۔
