الیکشن کمیشن کا بڈگام اور نگروٹہ کیلئے چناوی مبصرین کی تعیناتی کا اعلان
عظمیٰ نیوز سروس
سرینگر//الیکشن کمیشن آف انڈیا بہار انتخابات کے شیڈول کے ساتھ ہی جموں و کشمیر میں بڈگام اور نگروٹہ اسمبلی حلقوں کے ضمنی انتخابات کا اعلان کرنے والا ہے۔اتوار کو جاری کردہ ایک سرکاری بیان میں، پولنگ باڈی نے بڈگام اور نگروٹہ کے لیے مبصرین کی تعیناتی کا اعلان کیا، جو فی الحال جموں و کشمیر اسمبلی میں خالی پڑی ہوئی دو نشستیں ہیں۔ یہ اقدام اشارہ دیتا ہے کہ ان حلقوں کے لیے انتخابات کا اعلان قریب ہے۔ الیکشن کمیشن نے 470 افسران (320 آئی اے ایس، 60 آئی پی ایس، اور 90آئی آر ایس/آئی آر اے ایس/آئی سی اے ایس)وغیرہ کو مرکزی مبصرین (جنرل، پولیس، اور اخراجات)کے طور پر بہار کی قانون ساز اسمبلی کے آئندہ عام انتخابات، اور جھارکھنڈ، تلنگانہ، پنجاب، میزورم، اڈیشہ اور جموں و کشمیر کے ضمنی انتخابات کے لیے تعینات کرنے کا فیصلہ کیا ہے۔چیف الیکشن کمشنر گیانیش کمار کی قیادت میں تین رکنی کمیشن کے ریاست کے دورے کے بعد اکتوبر کے دوسرے ہفتے میں بہار کے انتخابات کے شیڈول کا اعلان متوقع ہے۔ اس سے پہلے، کمیشن 3 اکتوبر کو نئی دہلی میں مقرر کردہ جنرل، پولیس اور اخراجات کے مبصرین کے لیے ایک بریفنگ منعقد کرنے والا ہے۔جہاں تک سیاسی حرکیات کا تعلق ہے، بی جے پی اور نیشنل کانفرنس بالترتیب بڈگام اور نگروٹہ سیٹوں پر برتری رکھتے ہیں۔نگروٹہ میں بھارتیہ جنتا پارٹی (بی جے پی)اور نیشنل کانفرنس کے زیرقیادت اتحاد (این سی) کے درمیان براہ راست مقابلہ دیکھنے کا امکان ہے۔ دوسری طرف بڈگام میں این سی، پیپلز ڈیموکریٹک پارٹی ور پیپلز الائنس فار چینج اتحاد جس میں پیپلز کانفرنس، پیپلز ڈیموکریٹک فرنٹ، اور جسٹس اینڈ ڈیولپمنٹ فرنٹ شامل ہیں،کے درمیان ایک سہ رخی لڑائی دیکھنے کی توقع ہے۔
