بمراہ موثرترین یارکر کرانے والے گیند باز :اکرم

لاہور/پاکستان کے سوئنگ کے سلطان لقب سے معروف وسیم اکرم نے ہندستانی فاسٹ بالر جسپریت بمراہ کی ستائش کرتے ہوئے کہا ہے کہ موجودہ کرکٹ میں جسپریت بمراہ موثرترین یارکر گیند کرانے والے بالر ہیں۔  وسیم اکرم نے کہا کہ اس وقت انٹرنیشنل کرکٹ کھیلنے والے تیز گیند بازوں میں جسپریت بمراہ سب سے بہترین اور موثر یارکر کراتے ہیں۔وسیم اکرم نے یقین ظاہر کیا ہے کہ بمراہ رواں سال ورلڈ کپ میں ڈیتھ اوورز کے دوران فرق ثابت ہوں گے ۔ آسٹریلیا کی سرزمین پر ہندستانی ٹیم کے پہلی ٹیسٹ سیریز جیتنے میں اہم کردار ادا کرنے والے بمراہ کپتان وراٹ کوہلی کے سیٹ اپ کا اہم حصہ رہے ہیں۔سابق لیفٹ آرم فاسٹ بالر نے کہا کہ بمراہ کا منفرد ایکشن دیگر گیند بازوں سے بہت مختلف ہے اور وہ اچھی رفتار کے ساتھ گیند کو سوئنگ کرنے کے ساتھ ساتھ دونوں جانب موو کرنے کی بھی صلاحیت رکھتے ہیں لیکن جو چیز بمراہ کو خاص بناتی ہے وہ باقاعدگی کے ساتھ یارکر کرانے کی صلاحیت ہے ۔وہ صرف ون ڈے میچوں میں یارکر کا استعمال نہیں کرتے بلکہ ٹیسٹ میچ میں بھی کرتے ہیں جیسے میں اور وقار اپنے دور میں کیا کرتے تھے ۔ متحدہ عرب امارات میں ہونے والے 10پی ایل ٹینس بال ٹورنامنٹ کے مینٹور وسیم اکرم نے مزید کہا کہ اگر دیکھا جائے تو میں پاکستان سے اور بمراہ ہندستان سے ہیں اور ہم سب ٹینس بال کرکٹ کی پیداوار ہیں۔گلی محلے کی کرکٹ میں بلے باز صرف سیدھاکھیلنے پر مجبور ہوتے ہیں جس کے باعث گیند باز بہت جلد یارکر کرنا سیکھ جاتے ہیں ۔