یو این آئی
جنیوا //اقوام متحدہ کے سیکریٹری جنرل انتونیو گوتیرس نے سلامتی کونسل اجلاس سے خطاب کرتے ہوئے کہا ہے کہ جنگ سے پوری دنیا متاثر ہو رہی ہے، اسرائیل اور ایران فوری جنگ بندی کریں اور سنجیدہ مذاکرات کی طرف بڑھیں۔ان کا کہنا تھا کہ میرا پیغام بڑا واضح ہے کہ امن کو موقع دیا جانا چاہیے، ایران اور اسرائیل کے درمیان تنازع تیزی سے بڑھ رہا ہے۔ادھرفرانسیسی صدر ایمانویل میکرون نے کہا ہے کہ فرانس اور دیگر یورپی طاقتیں ایران کو اسرائیل کے ساتھ بڑھتے ہوئے تنازع کے خاتمے کیلئے ایک جامع سفارتی حل کی پیشکش کریں گی۔ایمانویل میکرون نے صحافیوں سے گفتگو کرتے ہوئے کہا کہ فرانسیسی وزیر خارجہ ڑاں نوئل بورو آج جنیوا میں ایرانی ہم منصب عباس عراقچی سے ملاقات کریں گے اور ’ مکمل سفارتی اور تکنیکی مذاکرات کی پیشکش’ کریں گے۔ایمانویل میکرون نے دارالحکومت پیرس کے باہر لی بورجے میں جاری ایئر شو کے موقع پر کہا کہ فرانس، جرمنی اور برطانیہ اپنے سفارتی حل کو میز پر لا رہے ہیں، ایران کو یہ ظاہر کرنا ہوگا کہ وہ ان مذاکرات میں شامل ہونے پر آمادہ ہے جو ہم تجویز کر رہے ہیں۔انہوں نے مزید کہا کہ ’ یہ انتہائی ضروری ہے کہ ایران کے ساتھ بامعنی مذاکرات پھر سے شروع کرنے کو ترجیح دی جائے، مذاکرات میں جوہری معاملہ، بیلسٹک پروگرام، اور تمام دہشت گرد گروہوں کی مالی معاونت ( کے موضوعات ) کو شامل ہونا چاہیے۔ ’فرانسیسی صدر نے خبردار کیا کہ’ کسی کو بھی اس خطرے کو نظر انداز نہیں کرنا چاہیے جو ایک جوہری ہتھیاروں سے لیس ایران پیدا کر سکتا ہے۔’خیال رہے کہ یورپی وزرائے خارجہ جنیوا میں ایران کے ساتھ جوہری پروگرام پر مذاکرات کریں گے، جرمنی، فرانس اور برطانیہ کے وزرائے خارجہ جمعہ کو جنیوا میں ایرانی ہم منصب عباس عراقچی سے ملاقات کریں گے۔تینوں یورپی وزرائے خارجہ ایرانی ہم منصب سے سے جوہری پروگرام پر مذاکرات کریں گے، ایران سے جوہری پروگرام پر مذاکرات کے لیے ملاقات پر امریکا کا بھی اتفاق ہے۔
