عظمیٰ نیوز سروس
سانبہ// سانبہ ضلع میں دوسری خاتون سے شادی کرنے کیلئے اپنی اہلیہ کو قتل کر نے کے الزام پولیس نے ایک شخص کو گرفتار کیا ہے۔ پولیس ترجمان نے بتایا کہ مقتولہ آرتی دیوی 27 اکتوبر کو سانبہ ضلع کے رام گڑھ علاقے میں واقع اس کی نند پور رہائش گاہ پر مشتبہ حالات میں مردہ پائی گئی تھی، جس کے بعد پولیس نے اس کی موت کی وجہ جاننے کے لیے تفتیشی کارروائی شروع کی۔ انہوں نے کہا کہ پولیس نے اس سلسلے میں مقدمہ درج کر کے تفتیش شروع کی اور طبی کاروائیاں مکمل کی، جس دوران پوسٹ مارٹم بھی کیا گیا۔ شواہد اکٹھے کرنے کے بعد اور پولیس نے اسے قتل کے مقدمے میں تبدیل کر دیا۔ پولیس ترجمان نے مزید بتایا کہ دوران تفتیش پولیس نے خاتون کے شوہر گردیپ سنگھ کو حراست میں لیا، جس نے پوچھ تاچھ کے دوران اعتراف جرم کر لیا۔ اُنہوں نے کہا کہ ابتدائی تفتیش گرفتار شخص نے انکشاف کیا کہ اہلیہ کو قتل کرنے کا مقصد دوسری خاتون سے شادی کرنا تھا۔ اُنہوں نے مزید بتایا کہ اس سلسلے میں قانونی کاروائی اور تفتیش جاری ہے۔
