سرینگر//ٹی ٹونٹی کرکٹ ورلڈ کپ میچ میںگزشتہ سال بھارت کے خلاف پاکستان کی جیت کے بعد مبینہ طور پر پاکستان کے حق میں نعرے لگانے کے الزام میںآگرہ جیل میں پانچ ماہ سے زیادہ عرصہ سے بند 3کشمیری طلباء کی ضمانتی عرضی منظور کی گئی۔ الہ آباد ہائی کورٹ نے بدھ کو تینوںکشمیری طالب علموں کو ضمانت دے دی۔ ارشد یوسف، عنایت الطاف شیخ اور شوکت احمد گنائی کو آگرہ پولیس نے 28اکتوبر 2021کو گرفتار کیا تھا۔ تینوں کے خلاف انڈین پینل کوڈ (IPC) اور انفارمیشن ٹیکنالوجی ایکٹ کی دفعہ 66F کے تحت میچ کے بعد مبینہ طور پر واٹس ایپ پیغامات "ملک کے خلاف" بھیجنے پردفعہ 124 اے (بغاوت)، 153اے (مختلف گروپوں کے درمیان دشمنی کو فروغ دینا) اور 505 (1) (بی) کے تحت مقدمہ درج کیا گیا تھا۔ تینوں کی ضمانت کی درخواست پر سینئر ایڈوکیٹ رمیش چند یادو نے دلیل دی، جس کی معاونت ایڈوکیٹ سنتوش کمار سنگھ نے کی۔انہوں نے کہا کہ تمام قانونی کارروائیاں جاری ہیں اور ایک دو روز میں طلباء کو رہا کر دیا جائے گا۔
آگرہ جیل میں بند 3کشمیری طلباء
