لاہور/ پاکستان کرکٹ ٹیم کے سابق کپتان شاہد آفریدی نے سال 1996 میں اپنے کریئر کی سب سے تیز ترین سنچری بنائی تھی جس کے 22 سال مکمل ہونے پر انہیں سوشل میڈیا پر مبارک باد کے پیغامات دیئے گئے ہیں ۔واضح رہے کہ آج کے دن 1996 میں شاہد آفریدی نے 37 گیندوں پر تیز ترین سنچری اس وقت کی ورلڈ چمپئنزٹیم سری لنکا کے خلاف کھیلتے ہوئے بنائی جو کہ اب تک کی تیسری تیز ترین ون ڈے انٹرنیشنل سنچری ہے جبکہ یہ پہلی تیز ترین سنچری ہے جوکسی ایشین بلے باز کی جانب سے بنائی گئی۔ایک صارف کے ٹوئٹ کا جواب دیتے ہوئے شاہد آفریدی نے لکھا کہ نیروبی میں شاندار دن کو22 سال گزر گئے ! آج بھی وہ اننگ یاد ہے اور وہ لمحہ جس نے میری زندگی بدل دی۔ اپنے مداحوں کا شکریہ ادا کرتے ہوئے انہوں نے لکھا کہ ا[؟]ْن تمام سالوں میں آپ کی محبت اور حمایت کا بے حد شکریہ ۔اسی حوالے سے آئی سی سی نے بھی اپنے ٹوئٹر ہینڈل سے ایک ٹوئٹ جاری کیا ہے جس میں انہوں نے لکھا کہ' 40 گیند ، 6 چوکے ، 11 چھکے ، 102 رنز! آج کے دن 1996 میں بوم بوم آفریدی نے سری لنکا کے خلاف 37 گیندوں پر 100 رنز بنائے ،یہ اس وقت ون ڈے انٹر نیشنل کی تیز ترین سنچری تھی۔واضح رہے کہ شاہد آفریدی نے 4 اکتوبر 1996 میں سری لنکا کے خلاف 37 گیندوں پرتیزترین سنچری کا ریکارڈ بنا کردنیا بھر میں مشہور ہوگئے تھے ، ان کا یہ ریکارڈ پہلے یکم جنوری 2014کو نیوزی لینڈ کے 'کورے اینڈرسن' اور پھرفروری 2015 میں جنوبی افریقہ کے ' اے بی ڈی ویلیئرز نے توڑا تاہم ایشیا سے اب تک کوئی کھلاڑی ان کا یہ ریکارڈ نہیں توڑ سکا ۔
آفریدی کے کریئر کی سب سے تیز ترین سنچری کے 22 سال مکمل
