عظمیٰ نیوز ڈیسک
سرینگر// وزیر دفاع راج ناتھ سنگھ نے وادی کشمیر میں آرمڈ فورسز (خصوصی اختیارات)ایکٹ کو جلد منسوخ کرنے کا اشارہ دیا ہے۔ تاہم، انہوں نے واضح کیا کہ حتمی فیصلہ مرکزی وزارت داخلہ کے پاس ہوگا۔سنگھ نے AFSPA پر نظرثانی کرنے کی ضرورت پر زور دیا، جو پریشان کن علاقوں میں مسلح افواج کے اہلکاروں کو وسیع اختیارات دیتا ہے، اور اگر انہیں امن عامہ کی بحالی کے لیے ضروری سمجھا جائے تو تلاشی، گرفتاری اور فائرنگ کرنے کی اجازت ملتی ہے۔راج ناتھ سنگھ نے جمعہ کو نیٹ ورک 18 سے بات چیت کے دوران کہا’’اب فیصلہ کرنے کا وقت آگیا ہے کہ اسے ہٹایا جاسکتا ہے، اب رپورٹ آنے کے بعد فیصلہ وزارت داخلہ کو کرنا ہوگا‘‘۔
انہوں نے وضاحت کرتے ہوئے کہا’’میں نے کہا کہ حالات ایسے ہو گئے ہیں کہ AFSPA کو ہٹایا جا سکتا ہے لیکن اس سلسلے میں جو بھی کارروائی کرنی ہے وہ وزارت داخلہ کرے گی، “۔AFSPA کے تحت مسلح افواج کی کارروائیوں میں سہولت فراہم کرنے کے لیے علاقوں یا اضلاع کو ڈسٹربڈ کے طور پر نامزد کیاجاتا ہے۔ایک حالیہ انٹرویو میں، وزیر داخلہ امت شاہ نے AFSPA کو منسوخ کرنے کے امکان کا بھی اشارہ دیا تھا، جس پر جموں و کشمیر کے سیاست دانوں کی طرف سے ملا جلا ردعمل سامنے آیا تھا۔یہ ایکٹ جموں و کشمیر میں 1990 کی دہائی میں ریاست کے کئی حصوں میں سمجھی جانے والی گڑبڑ کے درمیان متعارف کرایا گیا تھا، جس سے دفاعی فورسز کو امن برقرار رکھنے کی اجازت دی گئی تھی۔سنگھ نے فوجیوں کے بتدریج انخلا پر اعتماد کا اظہار کرتے ہوئے کہا، “جلد ہی جموں و کشمیر کی پولیس امن و امان کی دیکھ بھال کرے گی، اور فوجیوں کو آہستہ آہستہ واپس بلایا جائے گا۔ ہم نے7 سالوں سے ایک بلیو پرنٹ بنایا ہے، اور ہم جموں و کشمیر کی پولیس کو مضبوط بنانے پر کام کر رہے ہیں۔ زیادہ تر پرتشدد واقعات کو پولیس ہینڈل کرتی ہے کیونکہ وہ سب سے آگے ہوتے ہیں، اور مرکزی فورسز ان کا ساتھ دیتی ہیں۔ لہٰذا، صورتحال میں تبدیلی کا مشاہدہ کیا جا سکتا ہے‘‘۔انہوں نے پولیس فورس میں تبدیلی پر روشنی ڈالی، یہ نوٹ کرتے ہوئے کہ جب کہ پہلے ان پر بھروسہ نہیں کیا جاتا تھا، آج وہ آپریشنز کی قیادت کرتے ہیں، جس میں مرکزی فورسز مدد فراہم کرتی ہیں۔
