عظمیٰ نیوز سروس
سرینگر//حج بیت اللہ کی ادائیگی کے دوران میاں بیوی سمیت وادی سے تعلق رکھنے والے4حجاج کرام فوت ہوگئے ہیں۔ سرینگر کے مضافاتی علاقے خالد کالونی صورہ سے تعلق رکھنے والے محمد سلطان کوچھے اور انکی اہلیہ مالہ بیگم ارکان حج کی ادائیگی کے دوران فوت ہوئے۔محمد سلطان کوچھے کے پوتے فرقان احمد نے کشمیر عظمیٰ کو بتایا کہ جمرات مکہ میں شیطان کو کنکریاں مارنے(رمی) کے بعد دونوں میاں بیوی محمد سلطان کوچھے اور مالہ بیگم کو کچھ تھکاوٹ محسوس ہوئی اور انہوں نے اپنے بیٹے اور بہو کو کسی جگہ پرآرام کرنے کیلئے کہا۔
انہوں نے کہا کہ جب دونوں نے ایک جگہ آرام کیا،تو اسی اثناء میں دونوں میاں بیوی کی روح پرواز ہوئی۔فرقان نے بتایا کہ انکے والد عبدالحمید اور والدہ ،بھی حج پر ہے اور انہوں نے ہفتہ کو سرینگر میں اہل خانہ کو یہ اطلاع دی۔اس دوران سرینگر کے مضافاتی علاقے ہل ویو کالونی راولپورہ سے تعلق رکھنے والے جائوید احمد کاوسئہ ولد غلام مصطفی بھی مکہ میں فوت ہوئے۔اہل خانہ کے مطابق جاوید احمد کاوسہ دو روز قبل ارکان حج کی ادائیگی کے بعد سر زمین مقدس میں لاپتہ ہوئے تھے اور بعد میں انکی نعش برآمد ہوئی۔ موصوف کو وہیں پر سپرد لحد کیا گیا ۔ وہ 20 جون کو سرینگر سے حج کی ادائیگی کیلئے روانہ ہوئے تھے۔اس دوران صفاپورہ گاندربل سے ملحقہ علاقہ وانی پورہ کے 67 سالہ جلال الدین ولی بابا ولد ولی محمد بھی سر زمین مقد میں ہی موت کی آغوش میں سو گئے۔اہل خانہ کے مطابق جلال الدین وانی 17 جون کو حج ادا کرنے لئے روانہ ہوئے تھے اورجمعرات کو سعودی عرب میں حج کے احکامات مکمل کرتے ہوئے فوت ہوگئے۔مرحوم کے رشتہ داروں نے کشمیر عظمیٰ کو بتایا کہ جلال الدین کی موت کی خبر انہیں عین اس وقت ملی جب وہ وادی میں عید الضحیٰ منانے میں مصروف تھے۔
