اجیت دوول دوبارہ قومی سلامتی مشیر مقرر

 نئی دہلی //نریندرمودی حکومت نے اجیت دوول کو ایک بار پھر قومی سلامتی مشیر مقرر کیا ہے اور اس بار انہیں کابینہ وزیر کا درجہ دیا گیا ہے۔ مرکزی کابینہ کی تقرری کمیٹی نے ان کی تقرری کو منظوری دے دی ہے اور اسے 31 مئی سے نافذ سمجھا جائے گا۔ سرکاری حکم میں کہا گیا ہے کہ  اجیت دوول وزیر اعظم کی مدت کار یا اگلے حکم ،جو بھی مقدم ہو، تک اس عہدے پر فائز رہیں گے۔ حکم نامہ میں یہ بھی کہا گیا ہے کہ دوول کو کابینہ وزیر کا درجہ دیا گیا ہے۔مودی حکومت کے پہلے دور میں بھی وہ قومی سلامتی مشیر کی ذمہ داری سنبھال رہے تھے۔ نئی حکومت میں انہیں دوبارہ یہی ذمہ داری سونپی گئی ہے۔ یہ پہلا موقع ہے جب کسی قومی سلامتی مشیر کو کابینہ وزیر کا درجہ دیا گیا ہے۔اجیت دوول 1968 بیچ کے انڈین پولیس سروس کے افسر ہیں اور انہوں نے زیادہ تر وقت انٹلی جنس بیورو میں ہی کام کیا اور بعد میں اس کے سربراہ بھی بنے۔ انہوں نے کافی وقت تک پاکستان میں ہندوستانی ہائی کمیشن میں بھی کام کیا۔ وہ پہلے پولس آفیسر ہیں جنہیں کیرتی چکر کے اعزاز سے نوازا جا چکا ہے۔