عظمیٰ نیوز سروس
جموں// انسداد بدعنوانی بیورو نے جموں میں ایک پولیس انسپکٹر اور ایک ہیڈ کانسٹیبل کے خلاف مبینہ طور پر غیر متناسب اثاثے جمع کرنے کے الزام میں الگ الگ مقدمات درج کیے ہیں۔ اے سی بی ترجمان نے ایک بیان میں کہا کہ انسپکٹر امیت کمار کول اور ہیڈ کانسٹیبل راجندر کمار شرما کے خلاف غیر متناسب اثاثے رکھنے کے الزام میں مقدمات درج کیے گئے ہیں۔ بیان میں کہا گیا ہے کہ امیت کمار کول کے خلاف پی سی ایکٹ 1988 کے تحت ایف آئی آر نمبر/2024 01 کے تحت 13(1) (بی) اے سی بی جموں کی پولیس سٹیشن سنٹرل برانچ میں ایک خفیہ تصدیق کے نتائج کی بنیاد پر درج کی گئی ہے۔ ان پر الزام ہے کہ افسر کے ہاں آمدنی سے زیادہ اثاثے ہیں۔
اُنہوں نے کہا، “راجندر کمار شرما کے خلاف پی سی ایکٹ کی ایف آئی آر نمبر/2024 02 کے تحت 13(1)(بی) آر/ڈبلیو 13(2) پی ایس اے سی بی جموں میں درج کی گئی ہے۔ اہلکار نے اپنی آمدنی کے معلوم ذریعہ سے زیادہ اثاثے جمع کیے ہیں”۔ ترجمان نے کہا کہ ان کے گھروں اور کاروباری اداروں کی تلاشی بھی لی گئی، جس کے دوران مجرمانہ دستاویزات اور قیمتی سامان قبضے میں لے لیا گیا، جبکہ مزید تفتیش جاری ہے۔بتایا جاتا ہے کہ ان میں سے ایک سابق وزیر سکھنندن چودھری کے سابق پی آر او ہے۔ امیت کول خود اے سی بی میں تعینات ہیں۔اس کے ساتھ ہی ڈومانہ سیکٹر کے جھیری مارگ پر مشری والا میں راجندر شرما کے والد کی بیج اور کھاد کی دکان پر بھی چھاپہ مارا گیا ۔
