نوہٹہ میں نوجوان پر چاقو سے حملہ، ملزم گرفتار: پولیس

سری نگر// جموں وکشمیر کی گرمائی راجدھانی سری نگر کے نوہٹہ علاقے میں جمعے کی سہ پہر کو نوجوان پر چاقو سے حملہ کیا گیا جس کے نتیجے میں وہ شدید طورپر زخمی ہوا اور اس کو علاج ومعالجہ کی خاطر صدر ہسپتال سری نگر منتقل کیا گیا۔پولیس نے حملہ آور کو دھر دبوچ کر سلاخوں کے پیچھے دھکیل دیا ہے۔
اطلاعات کے مطابق پائین شہر کے نوہٹہ علاقے میں گنج بخش پارک کے نزدیک جمعے کی سہ پہر کو نوجوان پر چاقو سے وار کیا گیا جس کے نتیجے میں وہ شدید طورپر زخمی ہوا ۔معلوم ہوا ہے کہ زخمی نوجوان کو ابتدائی علاج ومعالجہ کی خاطر رعناواری ہسپتال منتقل کیا گیا جہاں سے اس کو صدر ہسپتال ریفر کیا گیا۔
مقامی ذرائع نے بتایا کہ نوجوان کے سر پر چاقو سے حملہ کیا گیا جس کے نتیجے میں اس کو شدید چوٹ آئی ہے۔دریں اثنا پولیس نے ٹویٹ کے ذریعے جانکاری دیتے ہوئے بتایا کہ نوہٹہ میں چاقو حملے میں ملوث نوجوان کو گرفتار کیا گیا ہے۔پولیس نے حملہ آور کی شناخت زبیر احمد بٹ ساکن راجوری کد ل سری نگر کے بطور کی ۔انہوں نے کہاکہ جس چاقو سے نوجوان پر حملہ کیا گیا اس کو بھی ضبط کیا گیا ہے۔
پولیس کے مطابق اس ضمن میں ایف آئی آر زیر نمبر 27زیر دفعات 323,341,307آئی پی سی کے تحت کیس درج کرکے مزید تحقیقات شروع کی گئی۔