عظمیٰ ویب ڈیسک
وشاکھاپٹنم/وزیر اعظم نریندر مودی نے ہفتے کے روز کہا کہ یوگا دنیا کو امن کی سمت میں لے جاتا ہے، خاص طور پر اس وقت جب دنیا تنازعات، بے چینی اور عدم استحکام کا سامنا کر رہی ہے۔
انہوں نے 11ویں بین الاقوامی یومِ یوگا کے موقع پر عالمی برادری سے اپیل کی کہ اس یوگا ڈے کو “انسانیت کے لیے یوگا 2.0” کے آغاز کا موقع بنائیں، جہاں باطنی سکون کو عالمی پالیسی کا حصہ بنایا جائے۔
وزیر اعظم وشاکھاپٹنم کے آر کے بیچ پر منعقدہ قومی تقریب سے خطاب کر رہے تھے جہاں انہوں نے تین لاکھ سے زائد افراد کے ہمراہ کامن یوگا پروٹوکول (CYP) انجام دیا۔
انہوں نے زور دیا کہ یوگا خوشی اور امن کی ضمانت دینے میں اہم کردار ادا کرتا ہے۔ “یوگا دنیا کو تصادم سے تعاون، اور تناؤ سے حل کی جانب لے جا سکتا ہے۔ آج جب دنیا تناؤ، بے چینی اور عدم استحکام کی کیفیت سے گزر رہی ہے، یوگا ہمیں امن کا راستہ دکھاتا ہے۔ یہ وہ ’پاز بٹن‘ ہے جس کی انسانیت کو ضرورت ہے – سانس لینے، توازن قائم رکھنے اور دوبارہ مکمل بننے کے لیےـ
وزیر اعظم نے کہا کہ یوگا کو صرف ذاتی مشق نہیں بلکہ عالمی شراکت داری کا ذریعہ بننا چاہیے، جہاں ہر ملک اور معاشرہ اسے اپنی زندگی اور عوامی پالیسی کا حصہ بنائے۔
انہوں نے دنیا بھر کے لوگوں کو یوگا کے عالمی دن کی مبارکباد دیتے ہوئے کہا کہ “یوگا صرف ایک ورزش نہیں بلکہ ایک طرزِ زندگی ہے۔ یوگا کا مطلب ہے ‘جُڑنا’، اور اس نے دنیا کو جوڑ دیا ہے۔
مودی نے یاد دلایا کہ 2014 میں جب بھارت نے اقوام متحدہ میں یوگا ڈے منانے کی قرارداد پیش کی تو 175 ممالک نے مختصر وقت میں اس کی حمایت کی۔ “یہ حمایت محض ایک قرارداد کے لیے نہیں تھی بلکہ انسانیت کی فلاح کے لیے پوری دنیا کی اجتماعی کوشش تھی ـ
انہوں نے کہا کہ 11 برس بعد آج یوگا کروڑوں لوگوں کی طرز زندگی کا حصہ بن چکا ہے۔ چاہے وہ اوپیرا ہاؤس کی سیڑھیاں ہوں، ماؤنٹ ایورسٹ کی چوٹی یا سمندر کی وسعت، ہر جگہ ایک ہی پیغام گونج رہا ہے: یوگا سب کے لیے ہے، ہر سرحد، پس منظر، عمر یا صلاحیت سے بالاتر ہو کر۔
وزیر اعظم نے کہا کہ انہیں اس بات پر فخر ہے کہ دیویانگ (خصوصی افراد) بریل میں یوگا شاستر کی تعلیم حاصل کر رہے ہیں، سائنسدان خلا میں یوگا کر رہے ہیں اور دیہاتوں کے نوجوان یوگا اولمپیاڈز میں حصہ لے رہے ہیں۔ انہوں نے بتایا کہ وشاکھاپٹنم کے ساحل پر بحریہ کے جہازوں پر بھی یوگا کیا جا رہا ہے۔
انہوں نے یوگا کے پیچھے یکجہتی کے جذبے کو اجاگر کرتے ہوئے کہا، “اس سال یوگا ڈے کا موضوع ہے: ‘ایک زمین، ایک صحت کے لیے یوگا۔ یہ موضوع اس گہری حقیقت کی عکاسی کرتا ہے کہ زمین پر موجود ہر شے کی صحت آپس میں جڑی ہوئی ہے۔ انسان کی بھلائی کا انحصار اس مٹی کی صحت پر ہے جو ہماری غذا اگاتی ہے، ان دریاؤں پر ہے جو ہمیں پانی دیتے ہیں، ان جانوروں پر ہے جو ہمارے ماحولیاتی نظام کا حصہ ہیں، اور ان پودوں پر ہے جو ہمیں خوراک مہیا کرتے ہیں۔ یوگا ہمیں اس باہمی ربط کا شعور دیتا ہے، اور ہمیں فطرت سے ہم آہنگی کی طرف لے جاتا ہے۔”
اس موقع پر آندھرا پردیش کے گورنر ایس عبدالنذیر، وزیر اعلیٰ این چندرابابو نائیڈو، نائب وزیر اعلیٰ پون کلیان، مرکزی وزیر صحت پرکاش جادھو، اور دیگر مرکزی و ریاستی وزراء، ایم پیز دی پُرندیشوری اور ایم بھارت بھی موجود تھے۔
