عشرت حسین بٹ

پونچھ// ضلع پونچھ کے سرحدی علاقہ براری ساوجیاں میں منگل کی بعد دوپہر ایک خاتون پہاڑی سے لڑھک کر لقمہ اجل بن گئی ہے۔
پولیس ذرائع نے بتایا کہ ضلع پونچھ کی تحصیل منڈی کے علاقہ براری ساوجیاں میں اس وقت ایک خاتون اپنے گھر کے نزدیک پہاڑی سے لڑھک کر لقمہ اجل بن گئی جب وہ اپنے مال مویشی کو چرا رہی تھی۔
اُنہوں نے بتایا کہ حادثے کی اطلاع ملتے ہی مقامی لوگ وہاں جمع ہو گئے اور اسے زخمی حالت میں ہسپتال منتقل کیا گیا، جہاں پہنچنے پر ڈاکٹروں نے اسے مردہ قرار دے دیا۔
ایس ایچ او پولیس پوسٹ ساوجیاں شوم نے بتایا کہ متوفی خاتون کی شناخت تیس سالہ پروانا بیگم زوجہ ذولفقار احمد ساکنہ براری گگڑیاں ساوجیاں کے طور پر ہوئی ہے۔
اُنہوں نے بتایا کہ طبی و قانونی لوازمات پورے کرنے کے بعد لاش کو آخری رسومات کیلئے اہلِ خانہ کے حوالے کر دیا گیا ہے۔