بارہمولہ میں خودکشی کی کوشش کے دوران خاتون کو بچا لیا گیا:پولیس

بارہمولہ//جموں و کشمیر پولیس نے اتوار کو ایک خاتون کو اس وقت بچالیا جب خاتون نے شمالی کشمیر کے بارہمولہ ضلع کے ڈیلینا علاقے میں پہاڑی سے کود کر خودکشی کرنے کی کوشش کی۔
ایک پولیس عہدیدار نے بتایا کہ مغربی بنگال کی رہنے والی خاتون خودکشی کرنے کیلئے ڈیلینا پہاڑی پر چڑھ گئی اور وہاں سے نیچے کودنے کی کوشش کی۔
انہوں نے کہاکہ پولیس کی ایک ٹیم موقع پر پہنچی اور خاتون کو بات چیت میں مشغول کیا، اور اسے پہاڑی کے کنارے سے ہٹا دیا گیا۔
اُنہوں نے بتایا کہ جس خاتون کو بچایا گیا اس کی شادی ڈیلینا کے رہائشی سے ہوئی ہے۔
عہدیدار نے بتایا،” خاتون کا بنگال میں اپنے خاندان سے رابطہ منقطع ہو گیا تھا، جس سے وہ بہت پریشان ہو گئی تھی، اسی وجہ سے اس نے یہ انتہائی قدم اٹھانے کی کوشش کی”۔
انہوں نے مزید کہا کہ خاتون کی کونسلنگ کی گئی ہے اور اسے خاندان کے افراد کے حوالے کر دیا گیا ہے۔