سرکاری تعطیل ہو یا نہ ہو ہم شیخ محمد عبداللہ کی برسی مناتے رہیں گے: ناصر اسلم

عظمیٰ ویب ڈیسک
سری نگر/جموں و کشمیر کے وزیر اعلیٰ عمر عبداللہ کے مشیر ناصر اسلم کا کہنا ہے کہ چاہئے حکومت سرکاری تعطیل رکھے یا نہ رکھے لیکن ہم شیخ محمد عبداللہ کی برسی ہر سال مناتے رہیں گے۔انہوں نے کہا کہ شیخ صاحب کی جموں وکشمیر کے لئے قربانیوں کو کبھی فراموش نہیں کیا جاسکتا ہے۔
واضح رہے کہ نیشنل کانفرنس کے صدر ڈاکٹر فاروق عبداللہ نے سینئر قائدین اور کارکنوں کے ساتھ پارٹی کے بانی اور سابق وزیر اعلیٰ شیخ محمد عبداللہ کی 43 ویں برسی کے موقع پر پیر کی صبح ان کے مزار واقع نسیم باغ میں حآضری دی اور اس دوران جموں و کشمیر کے عوام کے لئے ان کی خدمات کو یاد کیا گیا۔اس موقع پر ناصر اسلم نے میڈیا کو بتایاہم آج اپنے لیڈر شیخ محمد عبداللہ کو یاد کر رہے ہیں قوم کے تئیں ان کی قربانیوں کو کبھی فراموش نہیں کیا جاسکتا ہے۔
ان کا کہنا تھاجموں و کشمیر کے لوگوں کا وجود شیر کشمیر کے وژن اور جدوجہد کی وجہ سے ہے۔موصوف مشیر نے کہا کہ ہمارا فرض ہے کہ تنظیم کے طور پر بھی اور ذاتی طور پر بھی ان کو عقیدت کے پھول نچھاور کریں۔انہوں نے کہاہماری ذمہ داری ہے کہ ان تمام بزرگوں کو یاد کریں جنہوں نے ہمارے لئے قربانیاں دی ہیں۔
ان کا کہنا تھاحکومت شیخ محمد عبداللہ کی برسی پر سرکاری تعطیل ہو یا نہ ہو لیکن ہم ان کو لگاتار یاد کرتے رہیں گے۔ناصر اسلم نے بتایا کہ نیشنل کانفرنس ایک تحریک ہے جس کو اقتدار کے حصول یا کرسی حاصل کرنے کے لئے نہیں بلکہ لوگوں کی خدمت کرنے کے لئے بنایا گیا تھا۔انہوں نے کہاہماری اللہ تعالیٰ سے دعا ہے کہ ہم لوگوں کی خدمت کرنے مقصد میں کامیاب ہوجائیں۔