عظمیٰ ویب ڈیسک
سری نگر/محکمہ موسمیات کی پیش گوئی کے مطابق وادی کشمیر میں اگلے پانچ روز کے دوران موسم گرم اور مرطوب رہنے کا امکان ہے تاہم اس دوران کہیں کہیں ہلکی بارشیں ہوسکتی ہیں۔متعلقہ محکمے کے ایک ترجمان نے بتایا کہ وادی میں 5 اگست کو دن کے دوران موسم گرم اور مرطوب رہ سکتا ہے جبکہ اس دوران خاص کر جموں صوبے کے راجوری، ریاسی، اودھم پور، جموں اور کٹھوعہ اضلاع میں کہیں کہیں صبح اور شام کے وقت تیز بارشوں کا امکان ہے۔
انہوں نے کہا کہ وادی میں 6 سے 10 اگست تک موسم گرم اور مرطوب رہنے کا امکان ہے تاہم اس دوران کہیں کہیں ہلکی بارشیں ہوسکتی ہیں۔ان کا کہنا ہے کہ بعد ازاں وادی میں 11 سے 13 اگست تک کئی مقامات پر ہلکی سے درمیانی درجے کی بارشوں کا امکان ہے جبکہ جموں صوبے میں کہیں کہیں بھاری بارشیں ہوسکتی ہیں۔محکمے نے اپنی ایڈوائزری میں کہا کہ جموں صوبے میں 5 اور 6 اگست کو کچھ مقامات پر بھاری بارش کا امکان ہے۔انہوں نے کہا کہ اس دوران کہیں کہیں سیلابی ریلے آنے، لینڈ سلائیڈنگ اور پتھر کھسک آنے کے بھی خطرات ہیں۔
کشمیر میں 6 تا 10 اگست موسم گرم اور مرطوب رہنے کا امکان
