عظمیٰ ویب ڈیسک
سری نگر/محکمہ موسمیات کی پیش گوئی کے مطابق وادی کشمیر میں کم و بیش اگلے ایک ہفتے کے دوران موسمی صورتحال دگرگوں رہنے کا امکان ہے۔محکمے نے اپنی ایڈوائزری میں لوگوں کو تیز ہوائیں چلنے کے دوران جھیل ڈل، ولر اور دیگر آبی ذخائر میں شکارے یا کشتیاں چلانے سے احتراز کی صلاح دی ہے۔
متعلقہ محکمے کے ایک ترجمان نے بتایا کہ وادی میں 5 مئی کو گرج چمک کے ساتھ کہیں کہیں ہلکی بارش کا امکان ہے اور اس دوران تیز ہوائیں بھی چل سکتی ہیں۔انہوں نے کہا کہ 6 سے 8 مئی تک موسم جزوی طور پر ابر آلود رہنے کے ساتھ کہیں کہیں گرج چمک کے ساتھ ہلکی بارشیں ہوسکتی ہیں۔
ان کا کہنا ہے کہ بعد ازاں وادی میں 9 سے 11 مئی تک بھی ہلکی بارشیں متوقع ہیں اور اس دوران کہیں کہیں تیز ہوائیں بھی چل سکتی ہیں۔محکمے نے اپنی ایڈوائزری میں لوگوں سے مقامی انتظامیہ اور ٹریفک ایڈوائزریوں پر عمل کرنے کو کہا ہے۔
انہوں نے کہا کہ کہیں کہیں تیز بارشوں کے ساتھ ساتھ 40 سے 50 کلو میٹر فی گھنٹہ کی رفتار سے تیز ہوائیں چلنے کا امکان ہے۔ایڈوائزری میں لوگوں سے تیز ہوائیں چلنے کے دوران جھیل ڈل، ولر اور دیگر آبی ذخائر میں شکارے یا کشتیاں چلانے سے احتراز کرنے کی اپیل کی گئی ہے۔
انہوں نے کہا کہ کچھ مقامات پر مٹی کے تودے گر آنے کے بھی خطرات ہیں۔کسانوں سے کہا گیا ہے کہ وہ 6 مئی سے اپنے کھیے کھلیانوں اور باغوں میں اپنے آپریشنز شروع کر سکتے ہیں۔
کشمیر میں 11 مئی تک موسمی صورتحال دگرگوں رہنے کا امکان
