کشمیر میں اگلے چوبیس گھنٹوں کے دوران مزید بارشوں کا امکان

عظمیٰ ویب ڈیسک
سری نگر/محکمہ موسمیات کی پیش گوئی کے مطابق وادی کشمیر میں اگلے چوبیس گھنٹوں کے دوران مزید بارشوں کا امکان ہے۔متعلقہ محکمے کے ایک ترجمان نے بتایا کہ وادی میں 30 اور 31 جولائی کو موسم عام طور پر ابر آلود رہنے کے ساتھ کئی مقامات پر رک رک کر ہلکی سے اوسط بارش کا امکان ہے اور اس دوران کہیں کہیں تیز ہوائیں بھی چل سکتی ہیں۔
انہوں نے کہا کہ اس دوران جموں صوبے کے جموں، ریاسی، اودھم پور، کٹھوعہ، راجوری اور سانبہ اضلاع میں کہیں کہیں بھاری بارشوں کا امکان ہے۔ان کا کہنا ہے کہ بعد میں یکم اگست سے 3 اگست تک موسم ایک بار پر گرم اور مرطوب رہنے کا امکان ہے تاہم اس دوران کہیں کہیں گرج چمک کے ساتھ ہلکی بارشیں ہوسکتی ہیں۔
موصوف ترجمان نے بتایا کہ 4 سے 6 اگست تک دن کے دوران موسم گرم اور مرطوب رہ سکتا ہے تاہم کئی مقامات پر شام دیر گئے یا صبح کے وقت گرج چمک کے ساتھ ہلکی سے درمیانی درجے کی بارشوں کا امکان ہے۔
محکمے نے اپنی ایڈوائزری میں کہا ہے کہ 30 اور 31 جولائی کو کچھ مقامات پر تیز بارشیں اور تیز ہوائیں چل سکتی ہیں۔انہوں نے کہا کہ جموں صوبے کے کچھ حصوں میں بھاری بارشیں متوقع ہیں اور اس دوران کہیں کہیں سیلابی ریلے آنے، لینڈ سلائیڈنگ ہونے اور پتھر کھسک آنے کے بھی خطرات ہیں۔ایڈوائزری کے مطابق دریاؤں، ندی نالوں میں پانی کی سطح بڑھ سکتی ہے اور جموں صوبے کے کچھ نشیبی علاقوں میں پانی جمع ہوسکتا ہے۔