جموں و کشمیر کے نوجوانوں کو ملک کے اعلیٰ ترین صنعت کاروں میں دیکھنا چاہتا ہوں: ایل جی سنہا

جموں// لیفٹیننٹ گورنر منوج سنہا نے جمعہ کے روز کہا کہ حکومت اس بات کو یقینی بنانے کے لیے پُرعزم ہے کہ جموں و کشمیر کے نوجوان ملک کے صفِ اول کے صنعت کاروں میں شامل ہوں۔
آئی آئی ایم جموں میں منعقدہ ایک پروگرام سے خطاب کرتے ہوئے، لیفٹیننٹ گورنر سنہا نے جموں و کشمیر میں تیز رفتار صنعتی ترقی کو اجاگر کیا۔
انہوں نے کہا، “گزشتہ چند سالوں میں بے شمار صنعتیں قائم کی گئی ہیں اور مزید کئی منصوبے تکمیل کے مراحل میں ہیں۔ جموں و کشمیر نے ایک بے مثال صنعتی ترقی دیکھی ہے۔ حکومت پرعزم ہے کہ جموں و کشمیر کے نوجوان ملک کی معیشت میں نمایاں کردار ادا کرتے ہوئے اعلیٰ صنعت کاروں کے طور پر ابھریں”۔
ایل جی سنہا نے کہا، “ماضی میں بھارت عالمی سطح پر علم کا مرکز تھا اور اب یہ ذمہ داری نوجوانوں کی ہے کہ وہ ملک کو نئی بلندیوں تک لے جائیں”۔
نئی تعلیمی پالیسی (این ای پی) کو سراہتے ہوئے، انہوں نے اسے بھارت کے تعلیمی اور تکنیکی مستقبل کی تشکیل کے لیے ایک انقلابی روڈ میپ قرار دیا۔
انہوں نے کہا، “این ای پی ہماری رہنمائی کرے گی اور ہمارے تعلیمی نظام کو عالمی معیار سے ہم آہنگ کرنے میں اہم کردار ادا کرے گی”۔
تعلیمی اداروں اور صنعتوں کے درمیان تعاون پر زور دیتے ہوئے، ایل جی سنہا نے کہا، “جدت کو فروغ دینے اور جدید ٹیکنالوجیز کی ترقی کے لیے تعلیمی اداروں اور صنعتوں کے درمیان ہم آہنگی ضروری ہے، جو بھارت کو عالمی سطح پر مزید ترقی کی راہ پر گامزن کرے گی”۔