عظمیٰ ویب ڈیسک
سرینگر/کشمیر کو ریل کے ذریعے جوڑنے کا برسوں کا انتظار 19 اپریل کو ختم ہو جائے گا جب وزیر اعظم نریندر مودی کٹرا سے وادی کے لیے پہلی ٹرین کا افتتاح کریں گے۔
اس موقع پر ریلوے کے وزیر اشونی ویشنو، وزیر اعظم کے دفتر (PMO) میں وزیر مملکت ڈاکٹر جتندر سنگھ، لیفٹیننٹ گورنر منوج سنہا اور وزیر اعلیٰ عمر عبداللہ سمیت دیگر اہم شخصیات موجود ہوں گی۔
یہ پہلا موقع ہوگا جب کشمیر کے لیے براہ راست ٹرین سروس شروع کی جائے گی۔ اس سے قبل، ٹرین سروس صرف سنگلدان سے بارہمولہ کے درمیان اور ملک کے دیگر حصوں سے کٹرا تک ہی دستیاب تھی۔
ذرائع کے مطابق، وزیر اعظم نریندر مودی 19 اپریل کی صبح نئی دہلی سے اودھم پور کے آرمی ایئرپورٹ پہنچیں گے، جہاں سے وہ دنیا کے سب سے اونچے ریلوے پل، چناب برج کا دورہ کریں گے۔ ریلوے حکام انہیں اس پل کی تعمیر اور دیگر تکنیکی پہلوؤں پر بریفنگ دیں گے۔ اس کے بعد وہ کٹرا پہنچ کر ٹرین کا افتتاح کریں گے اور ایک عوامی جلسے سے خطاب کریں گے۔
ابتدائی طور پر یہ ٹرین کٹرا سے بارہمولہ تک چلے گی۔ تاہم، جموں ریلوے اسٹیشن کی توسیع کا کام مکمل ہونے کے بعد، جولائی یا اگست میں ٹرین کی سروس جموں سے بھی شروع کر دی جائے گی۔ فی الحال، ملک کے کسی بھی شہر سے براہ راست کشمیر کے لیے ٹرین دستیاب نہیں ہوگی۔
مسافروں کو پہلے کٹرا پہنچنا ہوگا اور وہاں سے دوسری ٹرین میں سوار ہونا پڑے گا۔ بعد میں یہ عمل جموں منتقل کر دیا جائے گا۔
مرکزی سیکرٹری داخلہ گووند موہن نے حال ہی میں جموں کا دورہ کر کے سیکیورٹی کے انتظامات کا جائزہ لیا۔ اسی روز ریلوے بورڈ کے چیئرمین اور ریلوے پروٹیکشن فورس (RPF) کے ڈائریکٹر جنرل نے بھی حالات کا معائنہ کیا۔
کٹرا سے بارہمولہ تک مختلف آزمائشی سفروں، بشمول وندے بھارت ایکسپریس، کو کامیابی سے مکمل کر لیا گیا ہے۔ سیکیورٹی انتظامات کو بھی حتمی شکل دے دی گئی ہے۔
اودھم پور-سرینگر-بارہمولہ ریل لنک (USBRL) پروجیکٹ کی مجموعی لمبائی 272 کلومیٹر ہے، جس میں سے 209 کلومیٹر کا کام مرحلہ وار مکمل کیا جا چکا ہے:
اکتوبر 2009: 118 کلومیٹر قاضی گنڈ-بارہمولہ سیکشن
جون 2013: 18 کلومیٹر بانہال-قاضی گنڈ سیکشن
جولائی 2014: 25 کلومیٹر اودھم پور-کٹرا سیکشن
فروری 2024: 48.1 کلومیٹر بانہال-سنگلدان سیکشن
گزشتہ سال جون میں سنگلدان-ریاسی سیکشن مکمل ہوا، جب کہ بقیہ 17 کلومیٹر کا کام تین ماہ قبل مکمل کیا گیا۔
وندے بھارت ایکسپریس کے خاص فیچرز
کشمیر کے لیے خصوصی طور پر ڈیزائن کی گئی وندے بھارت ایکسپریس ٹرین کٹرا اور سری نگر کے درمیان چلے گی۔
یہ ٹرین انتہائی سرد موسم، یعنی -20 ڈگری سینٹی گریڈ تک کے درجہ حرارت میں بھی چلنے کی صلاحیت رکھتی ہے۔
مسافروں اور ڈرائیوروں کی سہولت کے لیے جدید ہیٹنگ سسٹم نصب کیا گیا ہے۔
حفاظتی انتظامات میں CCTV کیمرے اور ایمرجنسی ٹاک بیک یونٹ شامل ہیں۔
اگرچہ یہ ٹرین بلٹ پروف شیشوں سے لیس نہیں، لیکن اس میں شٹر پروف ونڈوز نصب کی گئی ہیں۔
یہ منصوبہ 41,000 کروڑ روپے کی لاگت سے مکمل ہوا ہے، جو ہندوستان کی ریلوے تاریخ کا ایک اہم سنگ میل ہے۔
