عظمیٰ ویب ڈیسک
سری نگر/اقلیتی امور اور پارلیمانی امور کے وزیر کرن رجیجو نے پیر کو یہاں شہرہ آفاق جھیل ڈل کے کناروں پر واقع ایشیا کے سب سے بڑے باغ گل لالہ میں صبح کی سیر کی اور وہاں کے دلکش و دل پذیر نظاروں سے محظوظ ہوئے۔اس موقع پر وزیر اعلیٰ عمر عبداللہ بھی ان کے ہمراہ تھے اور اس دوران نیشنل کانفرنس کے صدر ڈاکٹر فاروق عبداللہ کے ساتھ بھی ان کی ملاقات ہوئی۔
موصوف مرکزی وزیر نےایکس پر ایک پوسٹ میں اس فرحت بخش تجربے کے بارے میں کہاسری نگر، جموں و کشمیر میں وزیر اعلیٰ عمر عبداللہ کے ساتھ ٹیولپ گارڈن کے متحرک رنگوں کے درمیان صبح کی ایک تازگی بخش سیر کی اور وہاں ڈاکٹر فاروق عبداللہ صاحب کے ساتھ بھی ملاقات ہوئی۔انہوں نے کہافطرت اپنے اوج کمال پر ہے اور گرم جوشی اور وژن سے بھری گفتگو سے یہ واقعی ایک خاص صبح رہی۔
واضح رہے کہ کرن رجیجو گزشتہ روز سری نگر پہنچے جہاں انہوں نے کشمیر یونیورسٹی میں منعقدہ لوک سماوردھان پارو کی تقریب میں شرکت کی۔
وزیر برائے قلیتی امور کرن رجیجو نے وزیر اعلیٰ عمر عبداللہ کے ہمراہ ’باغ گل لالہ ‘میں صبح کی سیر کی
