انفورسمنٹ ڈائریکٹوریٹ کی کارورائی ’’الٹا چور کوتوال کو ڈانٹے ‘‘ کی مانند

عظمیٰ ویب ڈیسک
سرینگر //نیشنل ہیرالڈ معاملے میں انفورسمنٹ ڈائریکٹوریٹ کی کارروائی کے خلاف احتجاج اور سوال اٹھانے پر کانگریس کو تنقید کا نشانہ بناتے ہوئے بی جے پی کے قومی جنرل سیکرتری ترون چھگ نے کہا کہ یہ ’’الٹا چور کوتوال کو ڈانٹے ‘‘ کی مانند ہے ۔
ترون چھگ نے کہا’’ جیسے ہی قانون سچائی کا پردہ فاش کرنے لگتا ہے، کانگریس انتقام کا رونا روتی ہے۔ سونیا گاندھی اور راہول گاندھی دھوکہ دہی اور غبن کے مقدمات میں کئی سالوں سے ضمانت پر ہیں، اب جب عدالت احتساب کا مطالبہ کرتی ہے، تو کیا وہ کانگریس کے دباؤ کے ہتھکنڈوں کا سہارا لے رہے ہیں، کیا ملک کے دباؤ کے ہتھکنڈوں پر یقین نہیں رکھتے؟۔‘‘
انہوں نے مزید کہا کہ کانگریس کا حالیہ احتجاج نظام انصاف میں مداخلت کی کوشش ہے۔انہوں نے کہا ’’ جب عدالت سونیا گاندھی اور راہول گاندھی کو طلب کرتی ہے، تو کانگریس انہیں بچانے کیلئے احتجاج کرتی ہے۔ وہ یہ پیغام دے رہے ہیں کہ قانون کو گاندھی نہرو خاندان کو ہاتھ نہیں لگانا چاہیے۔ یہ ذہنیت بدقسمتی اور بنیادی طور پر غیر جمہوری ہے‘‘۔
انہوں نے سی ایم بنرجی کے اس الزام پر سخت ردعمل ظاہر کیا کہ بی ایس ایف اہلکاروں نے مرشد آباد بدامنی کے دوران نوجوانوں کو پتھر پھینکنے کیلئے مبینہ طور پر رقم دے کر تشدد کو ہوا دی۔انہوں نے کہا ’’ وہ ذات پات اور مذہب کے نام پر سماج کو گمراہ کر رہے ہیں۔ملک کو خطرناک فرقہ وارانہ خطوط کی طرف دھکیل رہے ہیں۔ کانگریس کرناٹک اور کیرالہ کو تقسیم کی تجربہ گاہوں کے طور پر استعمال کر رہی ہے۔ ملک انہیں معاف نہیں کرے گا۔ ‘‘