یکم جنوری سے جموں و کشمیر میں برف و باراں کے دو مرحلوں کا امکان: محکمہ موسمیات

سرینگر// محکمہ موسمیات نے یکم جنوری سے 6 جنوری تک جموں و کشمیر اور اس کے ملحقہ علاقوں میں برف و باراں کی پیش گوئی کی ہے۔
محکمہ موسمیات کے ڈائریکٹر ڈاکٹر مختار احمد کا کہنا ہے کہ نئے سال کے پہلے ہفتے میں دو مغربی حلل جموں و کشمیر کو متاثر کریں گے۔
ڈاکٹر مختار احمد نے بتایا کہ 30 اور 31 دسمبر کو موسم عمومی طور پر خشک رہے گا۔ انہوں نے کہا کہ پہلی مغربی ہوائیں کمزور شدت کی ہوں گی، جو یکم جنوری کی شام اور رات کو بادلوں کے ساتھ چند مقامات پر ہلکی برفباری کا سبب بن سکتی ہیں اور 2 جنوری کی صبح تک جاری رہے گی۔
انہوں نے مزید بتایا کہ دوسرا مغربی حلل 3 سے 6 جنوری تک درمیانی شدت کا ہو گا، جس کے تحت جموں کے میدانی علاقوں میں ہلکی سے درمیانی بارش اور جموں و کشمیر کے مختلف مقامات پر برفباری ہوگی۔ ان مغربی ہواؤں کی شدت 4 اور 5 جنوری کو عروج پر ہوگی، جس کے دوران بالائی علاقوں میں شدید برفباری ہو سکتی ہے، جو آمد و رفت میں رکاوٹ ڈال سکتی ہے۔
ڈاکٹر مختار نے مشورہ دیتے ہوئے کہا کہ 30 اور 31 دسمبر کو بعض مقامات پر شدید سردی کی لہر ہوسکتی ہے۔ درجہ حرارت کے نقطہ انجماد سے نیچے گرنے اور سڑکوں پر برف کی تہہ جمنے کے باعث خاص طور پر نشیبی اور پہاڑی علاقوں میں مسافروں، سیاحوں اور ٹرانسپورٹروں کو مشکلات درپیش ہو سکتی ہیں۔
انہوں نے عوام سے اپیل کی کہ وہ اس دوران محتاط رہیں اور اپنے سفری منصوبے اسی کے مطابق ترتیب دیں۔