کٹھوعہ کے بنی-بسولی سڑک حادثے میں دو افراد ہلاک، چھ زخمی

عظمیٰ ویب ڈیسک
سرینگر/جموں و کشمیر کے ضلع کٹھوعہ کے بنی تحصیل میں پیر کے روز ایک المناک سڑک حادثے میں دو افراد جان بحق جبکہ چھ دیگر زخمی ہو گئے۔ یہ حادثہ بنی-بسولی سڑک پر اُس وقت پیش آیا جب ایک کیب گاڑی بے قابو ہو کر گہری کھائی میں جا گری۔
پولیس کے مطابق کیب میں آٹھ افراد سوار تھے، جن میں ایک خاتون بھی شامل ہے۔ حادثے کے فوراً بعد مقامی لوگوں اور پولیس نے مشترکہ طور پر بچاؤ کارروائی انجام دی اور زخمیوں کو قریبی اسپتال منتقل کیا گیا۔
پولیس نے مزید بتایا کہ شدید زخمیوں میں ایک نوعمر لڑکا بھی شامل ہے جسے بعد ازاں بہتر علاج کے لیے گورنمنٹ میڈیکل کالج کٹھوعہ ریفر کر دیا گیا۔حادثے کی وجوہات کا پتہ لگانے کے لیے پولیس نے تحقیقات شروع کر دی ہیں۔ ابتدائی اندازے کے مطابق سڑک کی خستہ حالی یا گاڑی کی رفتار حادثے کی ممکنہ وجہ ہو سکتی ہے۔مقامی انتظامیہ نے متاثرہ خاندانوں سے ہمدردی کا اظہار کرتے ہوئے ہر ممکن امداد کی یقین دہانی کرائی ہے۔