محمد بشارت
راجوری// ضلع راجوری میں گزشتہ پیش آئے الگ الگ سڑک حادثات میں کم از کم 2 افراد کی موت واقع ہو گئی ہے جبکہ 5 دیگر زخمی ہوئے ہیں۔
ذرائع نے بتایا کہ جموں-راجوری قومی شاہراہ پر ایک ماروتی ایکو زیر رجسٹریشن نمبر JK11E-3029 تھلکا کے قریب ڈرائیور کے قابو سے باہر ہو کر حادثہ کا شکار ہو گئی جس کے نتیجے میں ڈرائیور کی موت واقع ہو گئی۔ متوفی کی شناخت زبیر احمد (20) ولد محمد اکرم ساکنہ راجوری کے طور پر کی گئی ہے۔
انہوں نے بتایا کہ دوسرے شخص واجد حسین شاہ (25) ولد فرزان حسین شاہ کو بھی معمولی چوٹیں آئیں ہیں جسے ہسپتال داخل کرا دیا گیا ہے۔ انہوں نے مزید کہا کہ لاش کو قانونی کارروائی کے لیے ایس ڈی ایچ نوشہرہ منتقل کیا جا رہا ہے جبکہ مزید تفتیش شروع کر دی گئی ہے۔
اسی دوران کوٹرنکہ خواص سڑک پر گزشتہ رات قریب ایک بجے کلیاں کے مقام پر سرینگر سے کوٹرنکہ آ رہا ایک ٹیمپو زیر نمبر JK11A-1941 حادثہ کا شکار ہو گیا جس کے نتیجے میں محمد شکور ولد محمد بشیر ساکنہ سموٹ پھلنی کی موقع پر ہی موت واقع ہوگی جبکہ محمد یعقوب ولد محمد خان ساکنہ کنڈی، شکیل احمد ولد مقبول حسین ساکنہ مندرگالہ ، لعل دین ولد محمد شفیع ساکنہ دراج ، محمد سکندر ولد محمد خالق ساکنہ گھنڈ پورہ شوپیاں زخمی ہوئے۔
مقامی لوگوں نے پولیس و محکمہ صحت کے ملازمین کے ساتھ مل کر زخمیوں کو کمینوٹی ہیلتھ سنٹر کنڈی کوٹرنکہ پہنچایا جہاں ابتدائی علاج کے بعد بہتر علاج کے لیے جی ایم سی راجوری منتقل کیا گیا۔
اسی دوران پولیس نے واقع کا نوٹس لیتے ہوئے مقدمہ درج کر لیا ہے اور مزید تحقیقات شروع کر دی ہیں۔
