عظمیٰ ویب ڈیسک

کولگام// جنوبی کشمیر کے کولگام ضلع میں جمعہ کو پیش آئے ایک المناک حادثے میں 2 مزدرو کھائی میں گر کر جاں بحق ہو گئے ہیں جبکہ 2 دیگر زخمی ہوئے ہیں۔
مقامی ذرائع نے بتایا کہ جمعہ کو جنوبی کشمیر کے کولگام کے چک پورہ علاقے میں دو غیر مقامی افراد سمیت کم از کم چار افراد پھسل کر ایک کھائی میں جا گرے۔
اُنہوں نے بتایا کہ وہ کھائی میں کام کر رہے تھے کہ اچانک وہ پھسل کر اس میں گر گئے۔ انہوں نے کہا کہ واقعہ کے فوراً بعد پولیس، مقامی لوگ موقع پر پہنچے اور انہیں بچا لیا گیا۔
ایک پولیس اہلکار نے بتایا کہ انہیں ہسپتال منتقل کر دیا گیا ہے جہاں ان میں سے دو زخموں کی تاب نہ لاتے ہوئے دم توڑ گئے۔ متوفین کی شناخت کولگام کے مقبول ڈار اور بنگال کے عزیز الرحمان کے طور پر کی گئی ہے۔
میڈیکل سپرنٹنڈنٹ ڈسٹرکٹ ہسپتال کولگام، گلزار احمد ڈار نے بتایا کہ دو کو ہسپتال میں مردہ لایا گیا تھا، جبکہ ایک کا علاج جاری ہے اور دوسرے کو ہسپتال سے فارغ کر دیا گیا ہے۔