راجوری میں فلیش فلڈ کا واقعہ: دو بچے جاں بحق، ایک کو بچا لیا گیا

عظمیٰ ویب ڈیسک
سرینگر/جموں و کشمیر کے ضلع راجوری کے کالا کوٹ تحصیل کے سیالسوئی علاقے میں جمعرات کی صبح اچانک آنے والے فلیش فلڈ کے نتیجے میں دو بچے جاں بحق ہو گئے جبکہ ایک بچے کو زندہ بچا لیا گیا۔
ذرائع کے مطابق، ایک سرکاری عہدیدارنے بتایا، ’’تیز بارش کے باعث اچانک سیلاب آیا جس میں تین بچے بہہ گئے۔ افسوس کے ساتھ کہنا پڑتا ہے کہ دو بچے موقع پر ہی دم توڑ گئے، جبکہ ایک بچے کو مقامی لوگوں نے بچا کر نزدیکی طبی مرکز پہنچایا۔‘‘
انہوں نے مزید کہا کہ امدادی ٹیم، پولیس اور مقامی لوگ فوری طور پر جائے وقوعہ پر پہنچے اور کارروائی شروع کی۔ ’’انتظامیہ متاثرہ خاندانوں کو ہر ممکن مدد فراہم کر رہی ہے، جبکہ علاقے میں حفاظتی اقدامات اور صورتحال کا جائزہ لینے کا عمل جاری ہے۔حکام نے پانی کے قریب رہنے والے لوگوں اور دیگر حساس مقامات پر مقیم افراد سے اپیل کی ہے کہ وہ بارشوں کے اس سلسلے کے دوران محتاط رہیں اور احتیاطی تدابیر اختیار کریں۔