عظمیٰ ویب ڈیسک
سرینگر/سرینگر پولیس نے بدھ کے روز بتایا کہ قمر واری میں ہارون بیکری کے قریب 18 سالہ نوجوان پر کلہاڑی سے حملے میں ملوث تین افراد کو گرفتار کر لیا گیا ہے۔ پولیس کے مطابق یہ گرفتاری شہر بھر میں رات کے وقت چھاپوں کے دوران عمل میں آئی، اور استعمال شدہ ہتھیار بھی برآمد کر لیا گیا ہے۔
پولیس کے ترجمان نے جاری بیان میں کہا کہ قمر واری میں ایک پرتشدد حملے کے فوری اور مؤثر ردعمل کے طور پر، سرینگر پولیس نے مختلف علاقوں میں رات کے وقت چھاپے مار کر تینوں ملزمان کو گرفتار کیا۔بیان کے مطابق یہ واقعہ 14 اکتوبر 2025 کو ہارون بیکری، ہلال آباد، قمر واری کے قریب پیش آیا، جہاں نوجوان نعمان یعقوب کھانڈے پر نامعلوم حملہ آوروں نے کلہاڑی سے حملہ کیا۔ متاثرہ نوجوان کے والد، محمد یعقوب کھانڈے، جو بلال کالونی قمر واری کے رہائشی ہیں، نے فوری طور پر پولیس پوسٹ قمر واری میں رپورٹ درج کرائی۔بیان میں مزید کہا گیا کہ رپورٹ ملنے کے بعد پولیس اسٹیشن پریمپورہ میں متعلقہ دفعات کے تحت ایف آئی آر نمبر 100/2025 درج کی گئی۔
پولیس نے معاملے سے متعلق فوری طور تفتیش آغاز کیا، جس میں مشتبہ علاقوں کی ناکہ بندی، سی سی ٹی وی فوٹیج کا تجزیہ اور واقعے سے متعلق گاڑیوں کی تفصیلات کی تصدیق شامل تھی۔ تفتیش کے نتیجے میں ساحل یعقوب گروستو، ولد محمد یعقوب گروستو، رہائشی بوٹ مین کالونی؛ فاروق المعروف فرحان احمد دار، ولد غلام نبی دار، رہائشی بوٹ مین کالونی اور بلال احمد گورو، ولد ظہور احمد گورو، رہائشی بوٹ مین کالونی، بمنہکی شناخت اور گرفتاری عمل میں لائی گئی ۔
بیان میں کہا گیا کہ تینوں ملزمان کو رات کے وقت چھاپوں کے دوران گرفتار کیا گیا اور ہتھیار بھی برآمد کر لیا گیا۔ ابتدائی تفتیش سے معلوم ہوا ہے کہ حملہ ذاتی رنجش کی بنیادپر کیا گیاہے تاہم مزید تحقیقات دیگر ممکنہ پہلوؤں کی نشاندہی کے لیے جاری ہیں۔سرینگر پولیس نے ایک بار پھر کہا ہے کہ وہ سماجی جرائم کے خلاف فوری اور فیصلہ کن کارروائی جاری رکھے گی جو عوامی امن و امان کو خطرے میں ڈالیں۔ ایسے افراد کے لیے کوئی رعایت نہیں برتی جائے گی اور شہر کو محفوظ بنانے کے لیے کوششیں جاری رہیں گی۔
