دہلی دھماکے میں ملوث افراد کو سخت ترین سزا ملنی چاہیے: وزیراعلیٰ عمر عبداللہ

عظمیٰ ویب ڈیسک
سرینگر/وزیراعلیٰ عمر عبداللہ نے منگل کو کہا کہ دہلی دھماکے میں ملوث افراد کو سخت سے سخت سزا ملنی چاہیے، تاہم بےگناہوں کو شک کی نگاہ سے نہیں دیکھا جانا چاہیے۔نوگام دھماکے میں زخمی افراد کی عیادت کے بعد میڈیا سے گفتگو کرتے ہوئے وزیراعلیٰ نے کہا کہ انہوں نے کل نادرن زونل کمیٹی میٹنگ میں جموں کشمیر کے لوگوں کے حوالے سے یہ مسئلہ اٹھایا کہ ہر مسلمان کو مشکوک نظر سے نہ دیکھا جائے۔
انہوں نے کہادہلی دھماکے کے ذمہ داروں کو گرفتار کرکے سخت ترین سزا دی جائے۔ لیکن وہ بےگناہ لوگ، جن کا اس واقعے سے کوئی تعلق نہیں اور جو ہمیشہ تشدد کے خلاف آواز اٹھاتے رہے ہیں، انہیں اس میں نہ گھسیٹا جائے۔
ایک سوال کے جواب میں وزیراعلیٰ نے کہا کہ متاثرین کو سی ایم ریلیف فنڈ کے ذریعے معاوضہ فراہم کیا گیا ہے، لیکن چونکہ دھماکہ پولیس اسٹیشن کے اندر ہوا ہے، اس لیے ہوم ڈیپارٹمنٹ کو بھی آگے آکر امداد کرنی چاہیے۔انہوں نے مزید کہا کہ متاثرہ خاندانوں کو نوکری کے حوالے سے بھی معاوضہ فراہم کیا جائے گا۔ میں متعلقہ افسران کو ہدایت دوں گا کہ ضروری کارروائی مکمل کریں تاکہ متاثرہ خاندان کو ملازمت کا معاوضہ فراہم کیا جا سکے۔