جموں وکشمیر ہینڈی کیپڈ ایسوسی ایشن کا سری نگر میں مطالبوں کو لے کر احتجاج

عظمیٰ ویب ڈیسک
سری نگر/جموں وکشمیر ہینڈی کیپڈ ایسوسی ایشن نے جمعرات کو یہاں اپنے مطالبوں کو لے کر احتجاج درج کیا۔احتجاجیوں نے ہاتھوں میں بینرس اٹھا رکھے تھے اور وہ ’ہماری مانگیں پوری کرو‘جیسے نعرے لگا رہے تھے۔اس موقع پر ایسو سی ایشن کے صدر عبدالرشید بٹ نے میڈیا کو بتایاحال ہی میں جموں و کشمیر اسمبلی میں بجٹ پیش کیا گیا لیکن اس میں جسمانی طور معذور افراد کو نظر انداز کیا گیا۔
انہوں نے کہایہ بجٹ ان وعدوں اور یقین دہانیوں کے برعکس ہے جو ہمارے ساتھ کئے گئے تھے۔ان کا کہنا تھاہم 3 ہزار روپیہ ماہانہ پنشن، روزگار اور دیگر مسائل کے حل کا مطالبہ کرتے تھے لیکن ان میں سے کوئی مطالبہ پورا نہیں کیا گیا۔
موصوف صدر نے سرکار سے بجٹ پر نظر ثانی کرنے اور ارکان اسمبلی سے ان کے حق میں آواز بلند کرنے کی اپیل کی۔انہوں نے کہااگر ہمارے مسائل کو حل نہیں کیا گیا تو ہم اپریل کے پہلے ہفتے سے ایک طویل المدتی دھرنے پر بیٹھیں گے۔جاوید احمد ٹاک نامی پدم شری ایوارڈ یافتہ احتجاجی نے کہاہمارے ساتھ جو وعدے کئے تھے ان کو پورا نہیں کیا گیا جس کی وجہ سے ہم سب دل شکستہ ہیں۔
انہوں نے کہانیشنل کانفرنس نے 3 ہزار روپیہ ماہانہ پنشن دینے کا وعدہ کیا تھا لیکن ہمارے پنشن میں صرف 250 روپیوں کا اضافہ کیا گیا ہے۔ان کا کہنا تھاہم کوئی مزدوری نہیں کر سکتے ہیں ہم سب سے غریب طبقہ ہیں، ہمیں سب سے زیادہ مسائل کا سامنا ہے۔