سرینگر میں ملی ٹینٹوں اور ان کے سہولت کاروں کے خلاف جاری کریک ڈاون وسیع

عظمیٰ ویب ڈیسک
سرینگر/جموں و کشمیر پولیس نے دہشت گردی میں معاونت کے الزام میں ملوث افراد کے خلاف کریک ڈاون کا دائرہ وسیع کرتے ہوئے ہفتے کو سری نگر شہر میں متعدد مقامات پر چھاپے مارے۔ یہ کارروائی غیر قانونی سرگرمیوں کی روک تھام سے متعلق قانون (یو اے پی اے) کے تحت درج مقدمات کی تحقیقات کے سلسلے میں عمل میں لائی گئی۔
پولیس کے مطابق، اس کارروائی کا مقصد دہشت گرد تنظیموں کے نیٹ ورک کو توڑنا اور ان کے سہولت کاروں کو قانون کے کٹہرے میں لانا ہے۔ چھاپے مکمل قانونی عمل، ایگزیکٹو مجسٹریٹس اور آزاد گواہوں کی موجودگی میں مارے گئے۔
سرینگر پولیس نے درج ذیل افراد کے رہائشی مکانوں پر چھاپے مارے: امتیاز احمد پرے ولد غلام رسول پرے، ساکن قلمدان پورہ زینہ کدل، جن کے خلاف تھانہ مہاراج گنج میں کیس ایف آئی آر نمبر 29/2005 زیر دفعات 7/25 آرمز ایکٹ درج ہے۔ ارش کول ولد عاشق احمد کول، رہائشی دلال محلہ زینہ کدل، جن کے خلاف ایف آئی آر نمبر 35/2022 زیر دفعات 13، 18، 20، 23، 49 یو اے پی اے اور 7/25 آرمز ایکٹ درج ہے۔ مطیب ظہور بٹ ولد ظہور احمد بٹ ساکن بلال کالونی سورہ، جن کے خلاف ایف آئی آر نمبر 41/2021 زیر دفعات 13 یو اے پی اے، 188 اور 269 آئی پی سی تھانہ سورہ میں درج ہے۔ باسط اشرف ملک، ساکن نوپورہ صفا کدل، جن کے خلاف ایف آئی آر نمبر 156/2024 زیر دفعات 13، 19، 39 یو اے پی اے تھانہ صفا کدل میں درج ہے۔ محمد رفیق شاہ ولد نور محمد شاہ، ساکن ہزاری بازار رعناواری ، جن کے خلاف ایف آئی آر نمبر 48/2024 زیر دفعات 109 بی این ایس، 13، 16، 19، 20، 39 یو اے پی اے تھانہ خانیار میں درج ہے۔
پولیس کے مطابق ان چھاپوں کا مقصد ہتھیار، دستاویزات، ڈیجیٹل آلات اور دیگر شواہد جمع کرنا تھا تاکہ کسی بھی سازش یا ممکنہ تخریبی سرگرمی کی بروقت شناخت اور روک تھام کی جا سکے۔
ترجمان کے مطابق، ’یہ فیصلہ کن کارروائی جموں و کشمیر میں دہشت گردی کے ڈھانچے کو منہدم کرنے کی کوشش کا حصہ ہے۔ ایسے تمام افراد جو ملک دشمن سرگرمیوں میں ملوث پائے جائیں گے، ان کے خلاف سخت قانونی کارروائی عمل میں لانے سے بھی گریز نہیں کیا جائے گا۔‘
سری نگر پولیس نے عوام سے اپیل کی ہے کہ وہ امن و امان کو برقرار رکھنے میں انتظامیہ کے ساتھ تعاون کریں اور کسی بھی مشکوک سرگرمی کی اطلاع فوری طور پر متعلقہ اداروں کو دیں۔