عوامی حکومت کا پہلا بجٹ تعمیر و ترقی اور خوشحالی کی بنیاد ڈالے گا: ساگر

عظمیٰ ویب ڈیسک
سری نگر/جموں وکشمیر نیشنل کانفرنس کے جنرل سیکریٹری علی محمد ساگر کا کہنا ہے کہ الیکشن سے قبل عوام کے ساتھ کئے گئے تمام وعدوں کو پورا کرنے کی پالیسی پر کاربند ہیں۔انہوں نے کہا کہ اگلے ماہ اسمبلی میں پیش ہونے والے عوامی حکومت کا بجٹ منشور میں کئے گئے وعدوں کی تکمیل کی بنیاد ہوگا۔ان باتوں کا اظہار علی محمد ساگر نے پارٹی ہیڈ کواٹر پر لیڈران سے تبادلہ خیال کرتے ہوئے کیا۔
انہوں نے کہا کہ گذشتہ10سال کی بدحکمرانی، بد انتظامی ،غیر سنجیدہ اور غیر دانشمندانہ فیصلوں نے جموں کشمیر کو دہائیوں پیچھے دھکیل دیا اور اس کا تدارک کرنے کیلئے بہت وقت درکار ہوگا۔انہوں نے کہا کہ 6سال بعد عوامی کی طرف سے منتخبہ حکومت یہاں کے عوام کیلئے بجٹ پیش کرنے جارہی ہے اور ہمیں اُمید ہے کہ یہ بجٹ جموں وکشمیر کو پھر ایک تعمیر و ترقی کی راہ پر گامزن کرنے اور یہاں کے عوام کی خوشحالی، فارغ البالی اور راحت رسانی کیلئے بنیاد ڈالے گا۔
ساگر نے کہا کہ عوام نے نیشنل کانفرنس کو واضح منڈیٹ دیا ہے اور ہماری حکومت ہر کسی کیلئے برابر ہوگی۔ ہماری حکومت ہندو، مسلم، سکھ، عیسائی اور بودھ تمام مذاہب سے تعلق رکھنے والے لوگوں کیساتھ مساوات کی بنیاد سلوک روا رکھے گی۔خانیار کے ممبر اسمبلی نے کہاکہ مضبوط اور اچھی حکمرانی جبھی ممکن ہے جب پارٹی ہر سطح پر مضبوط سے مضبوط ہوگی اور یہ اُسی صورت میں ممکن ہے جب لوگوں کا بھر پور اشتراک اور تعاون شامل حال ہوگا اور پارٹی سے وابستہ ہر ایک فرد کا فرض بنتا ہے کہ وہ خود کو عوام کیلئے وقف رکھیں۔
انہوں نے آنے والے بلدیاتی اور پنچایتی انتخابات کے لئے بڑے پیمانے پر تیاری کرنے کی ضرورت پر زور دیااور کہا کہ ہر سطح پر موثر حکمرانی کو یقینی بنانے کے لئے نوجوان اور تعلیم یافتہ امیدواروں کے انتخاب عمل میںلانا انتہائی لازمی ہے۔انہوں نے کہاکہ پارٹی جلد ہی ممبر شپ مہم بھی شروع کرنے جارہی ہے اس کیلئے بھی ہمیں کمربستہ رہنے کے ضرورت ہے جس کے بعد تنظیمی انتخابات کا بھی انعقاد ہوگا۔ ساگر نے پارٹی سے وابستہ افراد پر زور دیا کہ وہ پارٹی کی مضبوطی کیلئے کام کریں اور خود کو لوگوں کیلئے وقف رکھیں۔