عظمیٰ ویب ڈیسک
سری نگر/جموں وکشمیر نیشنل کانفرنس کے صدر ڈاکٹر فاروق عبداللہ نے جمعرات کے روز کہا کہ کشمیرمیں برپا ہوئے حالات نے یہاں کے سیاحتی سیزن کو خاک میں ملا دیاہے ، جس کی وجہ سے اس صنعت سے جڑے لاکھوں افراد پریشانِ حال ہیں ۔
انہوں نے کہا کہ موجودہ صورتحال میں ہمیں اللہ کے دربار میں دست بہ دعا ہوکر امن و امان کیلئے دعا مانگنی چاہئے تاکہ اس جنت بے نظر میں مستقل امن کی بہار آئے اور پھر ایک بار سیلانیوں کی آمد ہو اور اس شعبے سے وابستہ لوگ اپنی روزی روٹی آرام سے کما سکے۔ان باتوں کا اظہار موصوف نے کپواڑہ میں پارٹی کارکنوں سے خطاب کے دوران کیا۔
انہوں نے کہا کہ جموں وکشمیر کے عوام کو گذشتہ10برس کے دوران پہاڑ نما مسائل و مشکلات کی چکی میں پیسا گیا اور ایک منصوبہ بند سازش کے تحت انہیں اقتصادی اور معاشی بدحالی میں مبتلا کردیا گیا، کشمیری قوم کو جان بوجھ کر ظلم و ستم کے ماحول میں رکھا گیا۔ ان مشکلات سے نجات دلانا ہماری حکومت کی اولین ترجیح ہے اور اس کیلئے حکومت اور انتظامیہ دن رات کام میں لگی ہوئی ہے۔
ڈاکٹر فاروق عبداللہ نے کہا کہ عوام نے نیشنل کانفرنس کو بھاری منڈیٹ ، اعتماد اور بھروسہ دیا ہے اور ہم عوام کے ووٹوں کی قدر جانتے ہیں اور عوامی توقعات پر کھرا اُترنے کیلئے تن دہی سے کام میں لگے ہوئے ہیں۔
انہوں نے کہا کہ ہماری جماعت نے انتخابی منشو رمیں جو جو وعدے کئے ہیں اُن کو پورا کرنا ہمارا فرض ہے اور ہم اس منشور پر اگلے 5سال من و عن کام کریں گے تاکہ یہاں کے لوگوں کو وہ راحت مل سکے جس کا انتظار وہ کافی دیر سے کررہے ہیں۔
ان کے مطابق عمر عبداللہ کی سربراہی میں حکومت اور عوام کے درمیان پیدا ہوئی خلیج کو ختم کرنے میں کامیابی حاصل کی ہے اور آج لوگوں کی ہر سطح پر شنوائی ہورہی ہے، عوامی نمائندے دکھ سکھ میں لوگوں کے بیچ ہیں اور لوگوں کے مسائل و مشکلات اب حل ہورہے ہیں۔
فاروق عبداللہ نے کہا کہ عوامی حکومت کے قیام سے پہلے یہاں کی انتظامیہ مفلوج ہوکر رہ گئی تھی اور عوامی کاموں کے بجائے غیر ضروری چیزوں کو ترجیح دی جارہی تھی۔ ڈاکٹر فاروق عبداللہ نے کہا کہ عوام کو ہر سطح پر راحت پہنچانے کیلئے نیشنل کانفرنس کے حوصلے بلند ہیں اور ہم لوگوں کیلئے خدمت کیلئے پُرعزم ہیں۔
