میرج اسسٹنس اسکیم میں مدد کی رقم کو 50 ہزار سے 75 ہزار روپیے کر دیا جائے گا: سکینہ یتو

عظمیٰ ویب ڈیسک
سری نگر/وزیر برائے صحت و تعلیم سکینہ یتو کا کہنا ہے کہ میرج اسسٹنس اسکیم چل رہی ہے اور اس اسکیم میں مدد کی رقم کو 50 ہزار روپیے سے بڑھا کر 75 ہزار روپیے کر دیا جائے گا۔انہوں نے کہا کہ اس کے لئے تعلیمی اہلیت کے معیار کو ختم کرنے کے لئے بھی تجویز زیر غور ہے۔
موصوف وزیر نے ان باتوں کا اظہار منگل کو یہاں نامہ نگاروں کے ساتھ بات کرنے کے دوران کیا۔انہوں نے کہامیرج اسسٹنس اسکیم چل رہی ہے اور اس میں پہلے ایک لڑکی کو شادی کے لئے 50 ہزار روپیے دئے جاتے تھے اس رقم کو بڑھا کر 75 ہزار روپیے کر دیا جائے گا۔ان کا کہنا تھاالیکشن سے پہلے ایک حکمنامہ آیا تھا جس میں اس کے لئے تعلیمی اہلیت کو معیار رکھا گیا تھا ہم اس کو ختم کریں گے کیونکہ لڑی کو شادی کرنی ہے اس میں تعلیمی قابلیت کا معیار کیوں رکھنا ہے۔
ایک سوال کے جواب میں سکینہ یتو نے کہاہم چاہتے ہیں کہ جموں و کشمیر کے لوگ صحت مند رہیں اور اس کے لئے وسیع پیمانے پر جانکاری مہم چلانے کی ضرورت ہے۔انہوں نے کہاجموں و کشمیر میں 0.6 فیصد ایڈز سے متاثرہ ہیں، یہ بھی نہیں ہونا چاہئے بلکہ جموں و کشمیر تمام بیماریوں سے پاک ہونا چاہئے۔
ان کا کہنا تھامحکمہ اس ضمن میں وسیع پیمانے پر جانکاری عام کرنے کے لئے کوشاں ہے۔انہوں نے کہا کہ دور دراز علاقوں میں ایڈز کے متعلق جانکاری پھیلانے کی کوشش کی جا رہی ہے تاکہ جس میں اس بیماری کی علامات پائی جاتی ہوں وہ سامنے آئے اور اس کا بر وقت علاج کیا جا سکے۔