محمد تسکین

بانہال// ضلع رام بن کی تحصیل کھڑی کے ناچلانہ فوجی کیمپ کے قریب آوارہ کتوں کے حملہ میں دو بچوں سمیت چار افراد زخمی ہوئے ہیں جنہیں مقامی ہسپتال منتقل کیا گیا ہے۔
تفصیلات کے مطابق، یہ واقعہ ہفتے کی بعد دوپہر ضلع رام بن کی تحصیل کھڑی میں قومی شاہراہ کے ساتھ واقع گاوں ناچلانہ میں پیش آیا۔
مقامی لوگوں اور ناچلانہ فوجی کیمپ کے جوانوں نے فوجی گاڑی میں زخمیوں کو علاج کیلئے سب ضلع ہسپتال بانہال منتقل کیا گیا جہاں انہیں اینٹی ریبیز کے انجکشن کورس اور دیگر ادویات تجویز کی گئیں۔
ناچلانہ کھڑی کے مقامی لوگوں نے الزام لگایا کہ فوجی کیمپ کے اردگرد کتوں کی بھاری تعداد موجود رہتی ہے اور ناچلانہ گاوں کے مقامی لوگوں کی آزادانہ نقل و حرکت کتوں کے حملوں کے خدشات کے پیش نظر محدود ہوگئی ہے۔
انہوں نے سب ڈویژنل اور ضلع انتظامیہ سے اس مسئلہ کے فوری حل کیلئے کتوں کو یہاں سے کہیں دور لیجانے کا مطالبہ کیا ہے۔