سری نگر میں کالعدم تنظمیوں سے وابستہ او جی ڈبلیوز کے گھروں پر چھاپے: پولیس

عظمیٰ ویب ڈیسک
سری نگر/پولیس کا کہنا ہے کہ ملی ٹینٹ نیٹ ورک کو ختم کرنے اور غیر قانونی سرگرمیوں پر قابو پانے کی مسلسل کوششوں کے تحت سری نگر پولیس نے غیر قانونی سرگرمیاں (روک تھام) ایکٹ (یو اے پی اے) کے تحت جاری مقدموں کی تحقیقات کے سلسلے میں شہر کے مختلف علاقوں میں بڑے پیمانے پر چھاپے مارے۔
انہوں نے کہا کہ یہ چھاپہ مارکارروائیاں ان ملی ٹینٹ معاونین اور اوور گراؤنڈ ورکرز (او جی ڈبلیوز) کے گھروں پر انجام دی گئیں جو کالعدم تنظیموں کے ساتھ وابستہ ہیں۔
ایک پولیس ترجمان نے بتایا کہ سری نگر کے مختلف علاقوں میں مربوط تلاشی کارروائیاں انجام دی گئیں تاکہ ان افراد کو نشانہ بنایا جاسکے جو ملی ٹینسی سے متعلق سرگرمیوں میں مدد یا سہولت فراہم کرنے میں ملوث ہیں۔
انہوں نے کہا کہ یہ کارروائیاں مکمل قانونی ضابطے کے مطابق مجسٹریٹوں اور آزاد گواہوں کی موجودگی میں پولیس کے سینئر افسروں کی نگرانی میں انجام دی گئیں۔
ان کا کہنا ہے کہ ان کارروائیوں کا مقصد دستاویزات، ڈیجیٹل آلات اور دیگر شواہد جیسے مجرمانہ مواد کو ضبط کرنا تھا جو جاری تحقیقات کے لئے اہم ہے۔
پولیس ترجمان نے بتایا کہ یہ چھاپے ایک وسیع انٹلی جنس جمع کرنے کی مہم کا ایک حصہ ہیں جس کا مقصد کسی بھی سازش یا ملی ٹینٹ سرگرمی کو پیشگی روکنا اور عوامی امن و سلامتی کو یقینی بنانا ہے۔
انہوں نے کہا کہ یہ فیصلہ کن اقدام سری نگر پولیس کے اس عزم کو ظاہر کرتا ہے کہ ملی ٹینسی سے متعلق یا ملک دشمن سرگرمیوں میں ملوث تمام افراد کی شناخت کرکے ان کے خلاف سخت قانونی کارروائی کی جائے گی۔
ان کا کہنا ہے کہ سری نگر پولیس شہر میں امن، استحکام اور عوامی نظم و ضبط کو بر قرار رکھنے کے لئے پر عزم ہے اور جو کوئی بھی پر تشدد سرگرمیوں کی مدد کرنے میں ملوث پایا گیا اس کے خلاف تحت قانون سخت کارروائی کی جائے گی۔