سری نگر جموں قومی شاہراہ ہنوز بند، بحالی کا کام جاری

عظمیٰ ویب ڈیسک
سری نگر/وادی کشمیر کو ملک کے باقی حصوں کے ساتھ جوڑنے والی سری نگر – جموں قومی شاہراہ پر ٹریفک کی نقل و حمل ہنوز بند ہے تاہم بحالی کا کام جاری ہے۔واضح رہے کہ گذشتہ شام مورگ کے مقام پر سڑک کھسکنے سے قومی شاہراہ پر ٹریفک کی نقل و حمل روک دی گئی ہے۔
ٹریفک حکام نے پیر کی صبح بتایاقومی شاہراہ ہنوز بند ہے تاہم بحالی کا کام جاری ہے۔انہوں نے مسافروں سے کہا ہے کہ سڑک صاف ہونے تک اس پر سفر کرنے سے گریز کریں۔ان کا کہنا ہے کہ جنوبی کشمیر کے ضلع شوپیاں کو صوبہ جموں کے پونچھ اور راجوری اضلاع کے ساتھ جوڑنے والے تاریخی مغل روڈ اور وادی کو لداخ یونین ٹریٹری کے ساتھ جوڑنے والی سری نگر لیہہ شاہراہ پر روڑ ٹھیک کرنے والی ایجنسیوں کی طرف سے گرین سگنل ملنے کے بعد ہی ٹریفک بحال کیا جائے گا۔
لوگوں سے کہا گیا ہے کہ وہ قومی شاہراہ کی صورتحال معلوم کرنے کے لئے ٹریفک پولیس ٹویٹر ہینڈل یا فیس بک پیج کی طرف رجوع کریں۔