عظمیٰ ویب ڈیسک

سرینگر// جموں و کشمیر کے لیفٹیننٹ گورنر منوج سنہا نے منگل کو کہا کہ سمارٹ سٹی پروجیکٹ کی وجہ سے سرینگر ملک میں شہری تبدیلی کے ماڈل کے طور پر ابھرا ہے۔

ایل جی سنہا یہاں شہر خاص (اندرونی علاقوں) میں تجدید و مرمت شدہ حبہ کدل پل کا افتتاح کرنے کے بعد صحافیوں سے بات کر رہے تھے۔

انہوں نے کہا، “سرینگر شہری تبدیلی کے ماڈل کے طور پر ابھرا ہے۔ آج، سری نگر کی شہری تبدیلی ملک کی بات ہے۔ درحقیقت اس کے بارے میں ملک کے دیگر شہروں کے مقابلے بہت بہتر انداز میں بات کی جاتی ہے۔ سمارٹ سٹی پروجیکٹ کے افسران نے پوری لگن کے ساتھ کام کیا ہے۔ میں اس کی حمایت کرنے کے لیے شہر کے لوگوں کا بھی شکر گزار ہوں‘‘۔

ایل جی نے کہا کہ سمارٹ سٹی پروجیکٹ کے تحت پل کی تزئین و آرائش شہر خاص کے لوگوں کے لیے ایک بہت بڑا تحفہ ہے۔

انہوں نے کہا کہ 5 کلومیٹر طویل جہلم ریور فرنٹ فیز ٹو کے لیے بھی 17.85 کروڑ روپے کی لاگت سے کام شروع کر دیا گیا ہے اور اس میں 24 گھاٹ ہوں گے۔

انہوں نے مزید کہا، “میرے خیال میں اس سے شہر کے رہائشیوں، خاص طور پر شہر خاص کے لوگوں کے معیار زندگی میں بہتری آئے گی”۔

یہ پوچھے جانے پر کہ کیا سرینگر کو پچھلی حکومتوں نے نظر انداز کیا تھا، سنہا نے کہا کہ یہ کہنا درست نہیں ہے، شہر بہتر ہو گیا ہے، اور مزید بہتری آئے گی۔