عظمیٰ ویب ڈیسک
نئی دہلی/سوشلسٹ پارٹی آف انڈیا نے وزیر داخلہ امت شاہ سے مطالبہ کیا ہے کہ وہ اخلاقی بنیادوں پر اپنا استعفیٰ پیش کریں کیونکہ وہ پہلگام دہشت گردانہ حملے میں معصوم سیاحوں کی جانوں کی حفاظت کرنے میں بری طرح ناکام رہے ہیں۔ ان خیالات کا اظہار پارٹی کے نائب صدر سید تحسین احمد نے دہشت گردی کے متاثرین کے ساتھ اظہار یکجہتی کے لیے بلائے گئے پارٹی اجلاس سے خطاب کرتے ہوئے کیا۔
انہوں نے کہا کہ پہلگام میں 26 معصوم سیاحوں کی جان لینے والے بدترین قسم کے جانور ہیں اور انسانیت کے خلاف اس گھناؤنے جرم کی مذمت کرنے کے لیے ہمارے پاس کوئی الفاظ نہیں ہے۔ سید تحسین کی صدارت میں ہونے والے اجلاس میں ساٹھ سے زائد عہدیداران اور پارٹی کارکنوں نے شرکت کی اور ہلاک سیاحوں کو خراج عقیدت پیش کرنے کے لیے دو منٹ کی خاموشی بھی اختیار کی۔
تحسین نے ملی ٹینٹ حملےکے واقعہ کے بعد کشمیریوں کے کردار کی تعریف کی۔ انہوں نے کہا کہ پورے کشمیر نے مکمل بند منایا اور زندگی کے ہر شعبے سے تعلق رکھنے والے ہزاروں افراد نے دہشت گردی کے حملے کی مذمت اور متاثرین کے ساتھ اظہار یکجہتی کے لیے پورے کشمیر میں نکالے گئے احتجاجی مظاہرے میں شرکت کی۔
انہوں نے کہا کہ سیاحت کشمیر کی معیشت میں ریڑھ کی ہڈی کی حیثیت رکھتی ہے اور ایک کشمیری کسی سیاح کو نقصان پہنچانے کا سوچ بھی نہیں سکتا۔ انہوں نے کہا کہ اس واقعہ کے بعد کشمیری صدمے کی حالت میں ہیں۔
ایس پی آئی کے نائب صدر نے تاہم کہا کہ دہشت گردی کے اس فعل کی مذمت اس وقت تک کافی نہیں جب تک ہم لوگوں کو جوابدہ نہ بنائیں۔ ایس پی آئی لیڈر نے کہا کہ یہ انتہائی بدقسمتی کی بات ہے کہ اس افسوسناک واقعہ کے بعد پورا گودی میڈیا معاملات کی سرکوبی کرنے والوں سے متعلقہ سوالات پوچھنے کے بجائے ہندو مسلم کرنے میں مصروف ہے۔ انہوں نے کہا کہ کسی بھی میڈیا ادارے میں وزیر داخلہ سے متعلقہ سوال پوچھنے کی ہمت نہیں ہے جو جموں و کشمیر میں امن و امان کے ذمہ دار ہیں۔ انہوں نے کہا کہ اس ملک کے وزیر داخلہ اور وزیر اعظم یہ دعویٰ کرتے رہے ہیں کہ انہوں نے کشمیر سے آرٹیکل 370 اوراے۔ 35 کو ختم کرکے اور عوام کی خواہشات اور امنگوں کے خلاف اسے دو مرکزی زیر انتظام علاقوں میں تقسیم کرکے انتہاپسندی کو ختم کردیا ہے۔
سوشلسٹ پارٹی کے رہنما نے کہا کہ ایک کشمیری اپنے پیاروں کو کھونے کے درد کو بہتر طور پر سمجھ سکتا ہے کیونکہ وہ گزشتہ تین دہائیوں کے دوران انتہاپسندوں کے تشدد میں ایک سے زیادہ بے گناہ لوگوں کو کھو چکے ہیں۔
پہلگام واقعہ کو روک نہ پانے پر سوشلسٹ پارٹی آف انڈیا نے وزیرداخلہ سے استعفی کا مطالبہ کیا
