شری امرناتھ یاترا: بھگوتی نگر بیس کیمپ کو یاتریوں کے استقبال کے لئے آراستہ کیا جار ہا ہے

عظمیٰ ویب ڈیسک
سرینگر/سالانہ شری امرناتھ جی یاترا کے لئے جہاں سیکورٹی کے انتظامات کو حتمی شکل دی گئی ہے وہیں یاتریوں کے لئے تمام تر سہولیات کو یقینی بنانے کے لئے بھی کام شد و مد سے جاری ہے جموں میں واقع بھگوتی نگر بیس کیمپ میں یاتریوں کے قیام و طعام کی بہتر سے بہتر سہولیات کو یقینی بنانے کے لئے کاریگر و مزدور مختلف کاموں میں ان دنوں مصروف ہیں۔
ملک بھر کے یاتری بھگوتی نگر بیس کمیپ پر ہی جمع ہوکر بالتل اور پہلگام کے راستوں سے شری امر ناتھ جی یاترا کے لئے کشمیر روانہ ہوتے ہیں۔امسال 39 دنوں پر محیط یہ پوتر یاترا 3 جولائی سے شروع ہوکر 9 اگست کو اختتام پذیر ہوگی۔ذرائع نے بتایا ’’یاترا کے پیش نظر جموں کے بھگوتی بیس کمیپ پر تیاریوں کو حتمی شکل دی جا رہی ہے۔‘‘
انہوں نے کہا ’اس کیمپ میں یاتریوں کو تمام تر سہولیات فراہم کرنے کے لئے جہاں پہلے سے موجود انفرااسٹرکچر کو اپ گریڈ کیا جا رہا ہے وہیں نئی اور جدید ترین فسلٹیز کو بھی یاتریوں کے لئے بہم رکھا جا رہا ہے‘۔ان کا کہنا تھا کہ کیمپ کو رنگ و روغن سے آراستہ و پیراستہ کیا جا رہا ہے اور وہاں قیام و طعام کی سہولیات کو بھی بہتر بنایا جا رہا ہے۔
ایک ذمہ دار نے بتایا ’’کیمپ میں صفائی ستھرائی سے لے کر لنگر سہولیات تک تمام تر تیاریوں کو حتمی شکل دی جا رہی ہے۔‘‘جموں کے بھگوتی نگر بیس کیمپ سے لے کر پہلگام اور بالتل تک تمام راستوں پر طبی مراکز، ٹریفک مینجمنٹ، پینے کے پانی، بجلی، قیام و طعام اور مواصلاتی نظام کی بہتری پر کام تیز کر دیا گیا ہے۔
متعلقہ حکام کے مطابق شردھالوؤں کے لیے سہولیات اور خدمات کو مزید بہتر بنانے کے لیے امسال مختلف نئے اقدام کئے گئے ہیں۔ادھر محفوظ اور پر امن یاترا کو یقینی بنانے کے لئے سیکورٹی کے بھی فقیدالمثال انتظامات کئے جا رہے ہیں۔
مرکزی وزارت داخلہ نے اس سال یاترا کے لیے 580 نیم فوجی کمپنیوں پر مشتمل تقریباً 42,000 اہلکاروں کی تعیناتی کا فیصلہ کیا ہے۔ ان میں سے 424 کمپنیاں جموں و کشمیر روانہ کی جا رہی ہیں، جب کہ باقی یونٹس، جن میں وہ 80 کمپنیاں بھی شامل ہیں جو ’آپریشن سندور‘ کے دوران پہلے ہی یو ٹی میں تعینات تھیں، کو یاترا کے راستے، سری نگر سمیت حساس علاقوں میں دوبارہ تعینات کیا جائے گا۔