شوپیاں :دو انتہا پسند گرفتار، اسلحہ و گولہ بارود بر آمد

عظمیٰ ویب ڈیسک
سری نگر/جنوبی کشمیر کے ضلع شوپیاں کے باسکوچھن علاقے میں تلاشی آپریشن کے دوران دو انتہا پسند معاونین کو گرفتار کیا گیاہے ۔ان کی تحویل سے اسلحہ و گولہ بارود بر آمد کیا ہے۔ یہ اطلاع سیکورٹی فورسیز کے حکام نے دی ہے۔
انہوں نے بتایا کہ ملی ٹنٹوں کی نقل و حمل کے متعلق ایک مصدقہ اطلاع پر کارروائی کرتے ہوئے سیکورٹی فورسز کی ایک مشترکہ ٹیم نے باسکوچھن علاقے کو محاصرے میں لے کر تلاشی آپریشن شروع کر دیا۔ان کا کہنا ہے کہ اس دوران دو ملی ٹنٹ معاونین کو گرفتار کیا گیا جن کی شناخت عرفان بشیر اور عزیر سلام کے طور پر کی گئی۔
حکام کے مطابق ان کی تحویل سے اسلحہ و گولہ بارود، جس میں 2 اے کے رائفلز شامل ہیں، بر آمد کیا گیا۔انہوں نے کہا کہ گرفتار شدگان کی پوچھ تاچھ کی جا رہی ہے۔تاہم پولیس کی طرف سے اس سلسلے میں اب تک کوئی بیان سامنے نہیں آیا ہے۔