عظمیٰ ویب ڈیسک

جموں// راجوری اور ریاسی اضلاع میں کئی لوگوں کے خلاف سوشل میڈیا پر ایودھیا میں رام مندر کی افتتاحی تقریب سے متعلق “قابل اعتراض مواد” پوسٹ کرنے کے الزام میں مقدمہ درج کیا گیا ہے۔
پولیس ذرائع نے کہا کہ رام مندر کی افتتاحی تقریب کے دوران، کچھ لوگوں نے سوشل میڈیا پر “حساس مواد” پوسٹ کیا ہے جس میں راجوری ضلع میں “پرامن ماحول کو خراب ہونے” کا امکان ہے۔
انہوں نے کہا کہ پولیس نے اس معاملے سنجیدگی سے لیا ہے اور ان افراد کے خلاف ایک کمیونٹی کے مذہبی جذبات کی توہین کا مقدمہ درج کیا ہے۔
پولیس نے کہا کہ ریاسی میں اسی طرح کے ایک معاملے میں، پولیس نے سوشل میڈیا پر مبینہ طور پر “قابل اعتراض مواد” پوسٹ کرنے کے الزام میں ایک شخص کے خلاف ایک اور مقدمہ درج کیا۔
ایس ایس پی ریاسی امیت گپتا نے لوگوں کو مشورہ دیا کہ وہ سوشل میڈیا پر کوئی بھی قابل اعتراض مواد پوسٹ کرنے سے گریز کریں جس سے علاقے میں امن اور ہم آہنگی خراب ہو۔
ایس ایس پی نے کہا، “تمام سوشل میڈیا پلیٹ فارمز کو دیکھا جا رہا ہے اور تمام پوسٹس اور تبصروں کی نگرانی کی جائے گی۔ ایسے شخص کے خلاف سخت کارروائی کی جائے گی جو اشتعال انگیز اور نفرت پھیلانے والی کوئی بھی پوسٹ کرتا ہے”۔