یو این آئی
سری نگر// سری نگر پولیس نے درندہ صفت بد نام زمانہ صحافی کو عصمت دری، بھتہ خوری اور بلیک میلنگ کے الزام میں دھر دبوچ کر سلاخوں کے پیچھے دھکیل دیا۔
پولیس کے ایک ترجمان نے بتایا کہ ایک دوشیزہ نے پولیس میں شکایت درج کی کہ ایک نہا م نہاد صحافی ندیم احمد گنائی عرف ندیم ناڈو ولد مختیار احمد گنائی ساکن قاضی باغ اننت ناگ نے سماجی رابط سائٹ وہاٹس اپ پر لوگوں کو جھانسہ دینے کی خاطر ایک وہاٹس گروپ بنایا تھا ۔
انہوں نے بتایا کہ شکایت کنندہ دوشیزہ بھی اسی فریب میں آگئی چنانچہ مذکورہ نام نہاد صحافی نے متاثرہ کے ساتھ جنسی تعلقات قائم کرنے پر مجبور کیا۔
اُن کے مطابق متاثرہ نے یہ بھی الزام لگایا کہ ملزم نے اس سے بے ہوش کرنے کے بعد اُس کی قابل اعتراض تصاویر بھی بنائی اور ا ن کا استعمال کرکے اسے کئی بار جبری جنسی تعلقات قائم کرنے پر مجبور کرنے کے ساتھ ساتھ اسے بلیک میل بھی کرتا رہا۔
موصوف ترجمان نے بتایا کہ ملزم نے بلیک میلنگ کے ذریعے دوشیزہ سے طلائی زیورات بھی حاصل کئے۔
بتادیں کہ کہ جب متاثرہ دوشیزہ کے ساتھ یہ معاملہ پیش آیا تب وہ سینٹرل کشمیر کے ایک انسٹی چیوٹ میں پڑھائی کر رہی تھی۔
پولیس نے معاملے کی نسبت ایف آئی آر زیر نمبر 50/22 زیر دفعات 376,384,506 آئی پی سی کے تحت کیس درج کرکے مزید تحقیقات شروع کی۔
پولیس ترجمان کے مطابق مزید حقائق اور اس کیس میں متاثرہ کی جانب سے لگائے گئے کچھ اور الزامات کا پتہ لگانے کی خاطر تفتیش کا سلسلہ وسیع کیا گیا ہے۔
کیس کی نوعیت کو بھانپتے ہوئے سری نگر پولیس نے ڈی ایس پی ہیڈ کواٹر اویس وانی کی سربراہی میں ایک خصوصی تحقیقاتی ٹیم تشکیل دی ہے جس میں ڈی ایس پی سلیٹ شاہ، ایس ایچ او وومنز پولیس تھانہ خالدہ پروین اور اسسٹنٹ سب انسپکٹر محمد یوسف شاہ شامل ہیں۔
سری نگر پولیس نے لوگوں کو یقین دلایا ہے کہ وہ خواتین کے ساتھ ہونے والی زیادتیوں اور نا انصافیوں کو کسی بھی صورت میں برداشت نہیں کرئے گی۔
انہوں نے کہاکہ جو کوئی بھی اس طرح کی کارروائیوں میں ملوث قرار پائے گا اُس کے خلاف سخت سے سخت کارروائی عمل میں لائی جائے گی۔
دریں اثنا خبر رساں ایجنسی ’جی این ایس‘ نے اس حوالے سے ایک بیان جاری کرتے ہوئے کہا کہ جب اُنہیں معلوم ہوا ہے کہ ندیم ناڈو کو سری نگر پولیس نے گرفتار کر لیا ہے تو اسی وقت ندیم ناڈو کو ادارے سے باہر کا راستہ دکھایا گیا۔
بیان میں واضح کیا گیا ہے کہ ادارے سے منسلک اگر کوئی بھی فرد کسی بھی غیر قانونی سرگرمی میں ملوث پایا گیا تو ادارہ کسی بھی صورت میں اُس کی حمایت یا مدد فراہم نہیں کرئے گا۔
بتادیں کہ ندیم ناڈو نامی درندہ صفت صحافی انگریزی خبر رساں ایجنسی جی این ایس کے ساتھ وابستہ تھا۔
