عظمیٰ ویب ڈیسک
ممبئی/ہندوستان اور پاکستان کے درمیان بڑھتی ہوئی کشیدگی کے پیش نظر ممبئی میں واقع ڈائریکٹوریٹ جنرل آف سول ایوی ایشن (ڈی جی سی اے) نے ملک کی تمام بندرگاہوں، ٹرمینلز، شپ یارڈز اور بحری جہازوں کی سیکیورٹی کو بڑھا دیا ہے۔ اس حکم کے بعد ممبئی کے ساحلی علاقوں میں سیکیورٹی کا جائزہ پولیس پورٹ زون کے ڈپٹی کمشنر نے لیا۔جے این پی ٹی بندرگاہ کے اطراف میں پنویل، ساسون ڈاک، بھاو کا ڈھاکہ، اندرا ڈاک اور ییلو گیٹ جیسے مقامات پر بھاری پولیس بندوبست تعینات کر دیا گیا۔ڈی جی سی اے کے ڈائریکٹر جنرل نے بندرگاہوں کی تمام سہولیات کے چیف انفارمیشن سیکیورٹی آفیسرز (سی آئی ایس اوز) کو ہدایت دی ہے کہ وہ اپنے آئی ٹی اور مواصلاتی نظام کی حفاظت کا از سر نو جائزہ لیں اور سائبر حملوں کے ممکنہ خطرات کو روکنے یا کم کرنے کے لیے مناسب اقدامات کریں۔
حفاظتی نظام کو فوراً MARSEC لیول-1 سے بڑھا کر MARSEC لیول-2 کر دیا گیا ہے۔ کیپٹن نتن مکیش، ڈپٹی ناٹیکل ایڈوائزر اور سینئر ڈی ڈی جی (ٹیک) نے ایک ایڈوائزری میں کہا: “یہ ہدایت قومی سمندری سلامتی کے مفاد میں دی گئی ہے اور اسے فوری اور اولین ترجیح کے ساتھ نافذ کیا جانا چاہئے۔ اس پر سختی سے عمل درآمد متوقع ہے اور کسی بھی خلاف ورزی کو انتہائی سنجیدگی سے لیا جائے گا۔”
یہ ایڈوائزری آل انڈیا سیفیئرس یونین (AISU) نے اپنے سوشل میڈیا پلیٹ فارم پر شائع کی تھی۔جاری کردہ آرڈر میں کہا گیا ہے کہ ہندوستانی ساحلی علاقوں، بندرگاہوں، ٹرمینلز اور جہازوں کو ممکنہ خطرات کے تناظر میں حالیہ حالات اور بڑھتے ہوئے خدشات کے پیش نظر اضافی حفاظتی اقدامات کی ضرورت ہے۔
تمام بندرگاہوں، ٹرمینلز اور شپ یارڈز کو ہدایت دی گئی ہے کہ وہ فوری اثر سے بین الاقوامی جہاز اور بندرگاہی سہولیات کے حفاظتی کوڈ (ISPS) کے تحت سیکیورٹی لیول 2 نافذ کریں۔برصغیر پاک و ہند اور اس کے آس پاس کے علاقوں میں کام کرنے والے تمام ہندوستانی پرچم والے جہازوں کو بھی کہا گیا ہے کہ وہ سیکیورٹی کی سطح کو 2 تک بڑھا دیں اور اپنے شپ سیکیورٹی پلان (SSP) کے مطابق تمام متعلقہ حفاظتی اقدامات کو نافذ کریں۔
ممبئی بندرگاہوں اور بحری جہازوں پر سیکورٹی سخت ، ممبئی کے ساحلی علاقوں میں مارسیک لیول 2 نافذ
